ہارون رشید بی بی سی اردو ڈاٹ کام، اسلام آباد

	طالبان نے کہا ہے کہ جب تک فوجی چوکیاں نہیں ہٹائی جائیں گی فائر بندی نہیں ہو گی

شمالی وزیرستان کے صدر میران شاہ میں فوجی قلعے پر منگل کی شام نامعلوم افراد نے حملہ کیا ہے تاہم اس میں کسی جانی نقصان کی اطلاع نہیں ہے۔ سکیورٹی فورسز نے بھی جوابی فائرنگ کی۔

طالبان کے ایک ترجمان نے بی بی سی سے بات کرتے ہوئے کہا کہ ایسی کسی جنگ بندی کا فیصلہ ان کی شوریٰ ہی کر سکتی ہے تاہم اس کے لیے حکومت کو ان کی علاقے سے نئی سکیورٹی چوکیاں ختم کرنے کا مطالبہ تسلیم کرنا ہوگا۔ ان کا کہنا تھا کہ جنگ بندی کا اعلان بھی صرف ان کے ترجمان احمد اللہ احمدی کرنے کا حق رکھتے ہیں۔

	شمالی وزیرستان کے میر علی علاقے میں دس روز تک کرفیو نافذ رہنے کے بعد اب اٹھا لیا گیا ہے

طالبان ترجمان کے بقول قبائلی جرگہ قیام امن کی کوششوں میں مصروف ہے تاہم یہ کوششیں کسی ایسے مقام پر نہیں پہنچی ہیں جہاں جنگ بندی کا اعلان کیا جاسکے۔

ادھر شمالی وزیرستان کے میر علی علاقے میں دس روز تک کرفیو نافذ رہنے کے بعد اب اٹھا لیا گیا ہے۔ فوجی ترجمان کا کہنا تھا کہ یہ پابندی عوام کے مفاد میں اٹھائی گئی ہے۔ کرفیو کے اٹھنے سے میران شاہ اور بنوں کے درمیان اہم شاہراہ بھی کھول دی گئی ہے۔

تاہم میجر جنرل وحید ارشد نے علاقے سے چوکیوں کے خاتمے کی خبروں کی تردید کی۔ ان کا کہنا تھا کہ اگر قبائلی جنگجوں کی جانب سے جنگ بندی کی کوئی درخواست حکومت کو موصول ہوئی تو وہ اس پر غور کرسکتی ہے۔

مقامی طالبان کے ترجمان کا کہنا تھا کہ شمالی وزیرستان میں طالبان حافظ گل بہادر کی قیادت میں متحد ہیں اور کسی اور کو جنگ بندی کے اعلان کی اجازت نہیں۔

گزشتہ دو ہفتوں کے دوران میر علی میں لڑائی کے دوران حکومت کے مطابق ڈھائی سو سے زائد افراد جن میں پچاس مشتبہ غیرملکی شدت پسند بھی شامل ہیں مارے گئے ہیں۔