ریاض سہیل بی بی سی اردو ڈاٹ کام، کراچی

	آصف بالادی پر دھماکہ خیز مواد رکھنے کا الزام ہے

آصف بالادی چھبیس جون دو ہزار چھ کو کراچی سے لاپتہ ہوگئے تھے۔ ان کے بیٹے جبران بالادی کا کہنا تھا کہ انہیں خفیہ ایجنسی کے اہلکاروں نے حراست میں لیا تھا۔

حیدرآباد کی لطیف آْباد پولیس نے آصف بالادی کی گرفتاری ظاہر کی ہے اور کہا ہے کہ ان پر دھماکہ خیز مادہ رکھنے کا الزام ہے۔ ان کو ان چار قوم پرست کارکنوں کا ساتھی بتایا گیا ہے جن کی گرفتاری ظاہر کرنے کے بعد پولیس نے دھماکہ خیز مادہ برآمد کرنے کا دعویٰ کیا تھا۔

آصف بالادی سے ان کے کچھ رشتہ داروں نے بھی ملاقات کی ہے، جن کو انہوں نے بتایا ہے کہ انہیں کوئٹہ سے بذریعہ جہاز کراچی ائرپورٹ لایا گیا جہاں سے انہیں حیدر آباد منتقل کیا گیا ہے۔

سندھ نیشنلسٹ فورم نامی تنظیم کے بانی آصف بالادی کو ان دنوں غائب کیا گیا تھا جب وہ پیغام سندھ کے نام سے بین الاقوامی کانفرنس کی تیاریوں میں مصروف تھے۔

لاپتہ افراد کی بازیابی کے لیے خفیہ اداروں کے خلاف جارحانہ رویہ اختیار کرنے والے سپریم کورٹ کے سابق چیف جسٹس افتخار محمد چودھری کی برطرفی اور عبوری آئینی حکم کے نفاذ کے بعد کسی لاپتہ رہنما کی یہ پہلی بازیابی ہے۔