اعتزاز احسن نے چند روز قبل اعلان کیا تھا کہ اگر سبوری ائین کا حکم جاری کیا گیا تو وکلا اس کی مزاحمت کریں گے

سپریم کورٹ بار ایسوسی ایشن کے نو منتخب صدر اعتزاز احسن کی اہلیہ بشریٰ اعتزاز نے بی بی سی اردو کی نعیمہ احمد سے بات کرتے ہوئے تصدیق کی ہے کہ ان کے شوہر اعتزاز احسن کو گرفتار کیا جا چکا ہے۔

انہوں نے بتایا کہ گرفتاری سے قبل اعتزاز احسن اپنے گھر میں ایک پریس کانفرنس سے خطاب کر رہے تھے کہ اس دوران پولیس اور رینجرز کے اہلکار گھر میں داخل ہو گئے اور انہیں گرفتاری کے احکامات سنائے گئے اور پھر انہیں گھر سے گرفتار کر کے لے گئے ہیں۔

ان کے مطابق اس وقت بھی رینجرز اور پولیس کے اہلکار ان کے گھر میں دندناتے پھر رہے ہیں۔ ان کا مزید کہنا تھا کہ پولیس اور رینجرز کے اہلکاروں نے چادر اور چار دیواری کے تقدس کو پامال کردیا ہے۔ان کے مطابق اعتزاز احسن کا قصور صرف اتنا ہے کہ وہ بار کے صدر ہیں اور انہوں نے عدالت کی جنگ میں بہت نمایاں کردار ادا کیا ہے۔

اعتزاز احسن کا قصور  اعتزاز احسن کا قصور صرف اتنا ہے کہ وہ بار کے صدر ہیں اور انہوں نے عدالت کی جنگ میں بہت نمایاں کردار ادا کیا ہے بشریٰ اعتزاز

اس سوال پر کہ اعتزاز کو گرفتار کرکے کہاں لے جایا گیا ہے؟ بشریٰ اعتزاز کا کہنا تھا کہ انہیں نہیں معلوم کے ان کے شوہر کو گرفتار کرکے کہاں لے جایا گیا ہے۔ تا حال ان کا اپنے شوہر سے کوئی رابطہ نہیں ہو پایا ہے۔

گرفتاری کے خلاف قانونی چارہ جوئی کیے جانے کے ایک سوال پر انہوں نے کہا کہ حکومت نے سپریم کورٹ کے ججوں کو سپریم کورٹ کی عمارت میں قید کیا ہوا ہے۔ ججوں کو اٹھا کر لے گئے ہیں۔ مارشل لاء لگا دیا ہے ۔ آپ کون سی قانونی چارہ جوئی کی بات کر رہی ہیں۔