انتخاب امیر بی بی سی اُردو ڈاٹ کام، پشاور

	لشکر کے بیشتر افراد امریکی بمباری کا نشانہ بن گئے تھے (فائل فوٹو)

منگل کو یہ نوٹس پشاور ہائی کورٹ کے دو رکنی ڈویژن بینچ نے صوبائی سیکریٹری داخلہ اور ڈیرہ اسمعیل خان جیل کے سپرنٹینڈنٹ کو جاری کیے ہیں۔ ان نوٹسوں میں عدالت نے مولانا صوفی محمد کی گرفتاری کے حوالے سے حکومتی اہلکاروں سے وضاحت طلب کی ہے۔

مولانا صوفی محمد کے داماد مولانا فضل اللہ نے پشاور ہائی کورٹ میں غیر قانونی حراست یا ’حبسِ بیجا‘ کے قانون کے تحت داخل کرائی گئی پٹیشن میں مؤقف اختیار کیا ہے کہ اُن کے سسر مولانا صوفی محمد کو سات سال کی مدتِ قید پوری کرنے کے باوجود رہا نہیں کیا جا رہا ۔

مقدمہ کے مطابق مولانا صوفی محمد کو بارہ دسمبر دو ہزار ایک کو پاکستان کے قبائلی علاقے کرم ایجنسی کی انتظامیہ نے اُس وقت گرفتار کر لیا تھا جب وہ تیس کے لگ بھگ ساتھیوں کے ہمراہ افغانستان سے پاکستان میں داخل ہوئے۔

سات اکتوبر دو ہزار ایک کو امریکہ کے افغانستان پر حملے کے بعد مولانا صوفی محمد کی قیادت میں ہزاروں افراد (جن کا تعلق پاکستان کے قبائلی علاقوں اور صوبہ سرحد کے ملاکنڈ کے علاقے سے تھا) پر مشتمل ایک لشکر افغانستان کے طالبان کے ساتھ امریکی فوجوں کے خلاف لڑنے کے لیے باجوڑ ایجنسی کے راستے افغانستان داخل ہوا تھا۔ اس لشکر کے بیشتر افراد امریکی بمباری کا نشانہ بن گئے تھے۔

صوفی محمد کو غیر قانونی طور پر پاکستان میں داخلے، دھماکہ خیز مواد رکھنے اور بھاری ہتھیار رکھنے کا مرتکب پاتے ہوئے سات سال کی قید کی سزا سنائی دی گئی۔ گو کہ ان کے بیشتر ساتھی ضمانت پر رہا ہوگئے لیکن مولانا صوفی محمد نے اس وجہ سے ضمانت پر رہائی کے لیے عدالت سے رجوع نہ کیا کہ وہ انگریز کے بنائے ہوئے قانون کے ذریعے رہائی حاصل نہیں کریں گے۔

اُن کے داماد مولانا فضل اللہ نے، جو کہ اب خود بھی حکومت کو سوات میں کشیدگی کے سلسلے میں مطلوب ہیں، عدالت سے استدعا کی ہے کہ مولانا صوفی محمد کو رہا کرنے کا حکم دیا جائے کیونکہ اُنہوں نے اپنی مدتِ قید پوری کر لی ہے ۔