عزیزاللہ خان بی بی سی اردو ڈاٹ کام، کوئٹہ

	سیکیورٹی فورسز کے پاس صحبت پور میں بگٹی قبیلے کے لوگوں کے بارے میں کچھ معلومات تھیں

پولیس حکام نے بتایا ہے کہ سیکیورٹی فورسز کے پاس صحبت پور میں بگٹی قبیلے کے لوگوں کے بارے میں کچھ معلومات تھیں جن کی بنیاد پر یہ کارروائی کی گئی ہے۔

جعفر آباد کے ضلعی پولیس افسر سہیل شیخ نے بتایا ہے کہ اس کارروائی میں فائرنگ کے تبادلے کے بعد دو افراد ہلاک اور کچھ کو گرفتار کر لیا گیا ہے۔

مقامی لوگوں نے بتایا ہے کہ مشترکہ کارروائی میں ایک ایف سی کا اہلکار اور ایک کمسن بچی سمیت پانچ افراد زخمی ہوئے ہیں۔

مقامی صحافی شریف منگی نے بتایا ہے کہ پولیس نے چار زخمیوں سمیت بارہ افراد کو گرفتار کیا ہے جن میں سے کچھ کو نامعلوم مقام پر منتقل کر دیا گیا ہے۔

انہوں نے کہا کہ اس علاقے سے تعلق رکھنے والی خاتون نے بتایا ہے کہ رات کے وقت وہ سوئے ہوئے تھے کہ اچانک ان پر حملہ کر دیا گیا ہے۔

ایسی اطلاعات موصول ہوئی ہیں کہ اس علاقے میں ماضی میں فراری کمانڈر آباد تھا لیکن اسے گرفتار نہیں کیا جا سکا۔

اپنے آپ کو بلوچ لبریشن آرمی کا ترجمان ظاہر کرنے والے بیبرگ بلوچ نامی شخص نےگزشتہ روز ٹیلیفون پر بتایا تھا کہ سیکیورٹی فورسز نے کاہان اور دیگر علاقوں میں فضائی حملے کیے ہیں اور بڑی کارروائی شروع کر رکھی ہے لیکن سرکاری سطح پر اس کی تصدیق نہیں ہو سکی۔