رفعت اللہ اورکزئی بی بی سی اردو ڈاٹ کام پشاور

	ہنگو میں پہلے بھی پولیس اور سیکیورٹی اہلکاروں پر حملے ہوئے ہیں

تھانہ ہنگو کے ایک اہلکار غنی محمد نے بی بی سی کو بتایا کہ یہ واقعہ منگل کی شام بازار سے چند کلومیٹر کے فاصلے پر ہنگو ٹل شاہراہ پر افطاری کے وقت پیش آیا۔ ان کےمطابق سڑک پر جا رہے ایک گاڑی میں سوار نامعلوم مسلح افراد نے کوٹکی پایان پولیس چوکی پر خودکار ہتھیاروں سے فائرنگ کر دی جس کے نتیجے میں وہاں موجود تین اہلکار موقع پر ہلاک جبکہ دو زخمی ہوگئے۔

انہوں نے کہا کہ پولیس اہلکار افطاری کر رہے تھے کہ اس دوران ان پر نامعلوم کار سواروں کی طرف سے فائرنگ کی گئی۔

واقعہ کے فوری بعد اعلٰی پولیس اہلکار موقع پر پہنچے اور شہر کو آنے اور جانے والے تمام راستوں کی ناکہ بندیاں کر کے حملہ آوروں کی تلاش کا کام شروع کر دیا گیا۔

زخمیوں کو سول ہسپتال ہنگو منتقل کیا گیا ہے۔

دریں اثناء گورنر سرحد علی محمد جان اورکزئی نے کوٹکی پایان میں پولیس اہلکاروں پر فائرنگ کی مذمت کی اور اہلکاروں کی ہلاکت پر سخت افسوس کا اظہار کیا ہے۔

یادرہے کہ گورنر سرحد علی محمد جان اورکزئی کا تعلق بھی کوٹکی پایان سے ہیں۔

صوبہ سرحد کے بیشتر اضلاع میں گزشتہ چند ماہ میں پولیس اہلکاروں پر حملوں میں اضافہ دیکھنے میں آیا ہے۔ ان میں ضلع سوات سب سے زیادہ متاثر ہوا ہے جہاں درجنوں پولیس اہلکار ان حملوں کا شکار ہوئے ہیں۔