عبدالحئی کاکڑ بی بی سی اردو ڈاٹ کام، پشاور

	سکیورٹی فورسز کو قلعہ کے گیٹ کے سامنے ایک مبینہ طالب کی لاش ملی (فائل فوٹو)

یہ حملہ بدھ کی رات کو شمالی وزیرستان کی سرحد پر واقع ضلع ہنگو کے تحصیل ٹل میں واقع فرنٹئیر کانسٹبلری کے نوئی ڈنڈ قلعہ پر کیا گیا ہے۔

قلعہ کے انچارج نائب صوبیدار رشید احمد نے بی بی سی سے بات چیت کرتے ہوئے دعوی کیا کہ بدھ کی رات ساڑھے دس بجے شمالی وزیرستان سے آئے ہوئے درجنوں مسلح طالبان نے قلعہ پر بھاری ہتھیاروں سے حملہ کردیا جسکے بعد سکیورٹی فورسز اور مبینہ طالبان کے درمیان لڑائی شروع ہوگئی جو رات کے دو بجے تک جاری رہی۔

رشید احمد کا مزید کہنا تھا کہ لڑائی کے دوران دونوں طرف سے بھاری ہتھیاروں کا استعمال کیا گیا جسکے نتیجے میں قلعہ کی عمارت کو شدید نقصان پہنچا۔ان کے مطابق ساڑھے تین گھنٹے تک جاری رہنے والی لڑائی اس وقت ختم ہوگئی جب مبینہ طالبان واپس چلے گئے۔

رشید احمد کے بقول بعد میں سکیورٹی فورسز کو قلعہ کے گیٹ کے سامنے ایک مبینہ طالب کی لاش ملی جسکے قریب راکٹ لانچر کا گولہ اور دستی بم بھی ملا ہے۔

واضح رہے کہ چند روز قبل بھی ایک خودکش حملہ آور نے ضلع ہنگو میں سکیورٹی فورسز کے ایک چیک پوسٹ پر حملہ کیا تھا جس میں ایک خاتون سمیت پانچ افراد افراد ہلاک اور چودہ زخمی ہو گئے تھے۔