عبدالحئی کاکڑ بی بی سی اردو ڈاٹ کام، پشاور

	ہنگو میں تین ہفتے قبل پولیس ٹریننگ سینٹر پر بھی ایک مبینہ خودکش حملہ کیا گیاتھا جس میں آٹھ افراد ہلاک ہوگئے تھے ۔ فائل فوٹو

ہنگو کے سپرنٹنڈنٹ پولیس غلام محمد نے بی بی سی کو بتایا کہ سنیچر کی رات ساڑھے نو بجے شہر سے پچیس کلومیٹر دور خیساری کیمپ کے قریب پولیس اہلکار معمول کے گشت پر تھے کہ بعض نامعلوم افراد نے فائرنگ کرکے تین پولیس اہلکاروں کو موقع پر ہی ہلاک کردیا۔ انکے مطابق حملہ آور جائے وقوعہ سے فرار ہونے میں کامیاب ہوگئے ہیں تاہم پولیس نے انکی تلاش شروع کردی ہے۔

واضح رہے کہ قبائلی علاقے اورکزئی ایجنسی سے متصل صوبہ سرحد کے ضلع ہنگو میں تین ہفتے قبل پولیس ٹریننگ سینٹر پر بھی ایک مبینہ خودکش حملہ کیا گیاتھا جس میں آٹھ افراد ہلاک ہوگئے تھے جن میں زیادہ تر عام شہری تھے۔ ضلع ہنگو میں گزشتہ دو سال سے خودکش حملوں، بم دھماکوں اور سکیورٹی فورسز پر قاتلانہ حملوں میں اضافہ دیکھنے میں آیا ہے۔