رفعت اللہ اورکزئی بی بی سی اردو ڈاٹ کام، پشاور

	ہلاک ہونے والوں میں علماء کرام بھی شامل ہیں

ہلاک ہونے والوں میں متحدہ مجلس عمل کے ضلعی صدر مفتی دین اصغر کے چچا زاد بھائی بھی شامل ہیں۔ ہنگو کے نائب ضلعی ناظم حاجی گل کریم نے بی بی سی کو بتایا کہ یہ واقعہ بدھ کی شام قبائلی علاقے اورکزئی ایجنسی کی سرحد کے ساتھ واقع بندوبستی علاقے زرگری میں پیش آیا۔

ان کے مطابق قبائلی عمائدین اور علماء کرام پر مشتمل امن کمیٹی کے ممبران کا گل معید نامی ایک مسلح گروہ کے سربراہ سے جرگہ جاری تھا کہ اس دوران فریقین کے مابین کسی بات پر تلخ کلامی ہوئی جس سے دونوں طرف سے مسلح افراد نے خودکار ہتھیاروں سے فائرنگ شروع کردی جس میں سات افراد ہلاک اور بارہ زخمی ہوئے۔

عینی شاہدین کا کہنا ہے کہ اس واقعے میں آٹھ افراد ہلاک اور پندرہ زخمی ہوئے ہیں۔

ہلاک ہونے والوں میں متحدہ مجلسِ عمل کے ضلعی صدر مفتی دین اصغر کے چچا زاد بھائی نور اصغر ، علماء کرام اور مسلح گروہ کے سربراہ گل معید اور ان کے بیٹے شامل ہیں۔

مقامی ذرائع کا کہنا ہے کہ امن کمیٹی میں اکثریت مقامی طالبان کی ہے جنہوں نے علاقے میں حال ہی میں جرائم پیشہ افراد کے خلاف کاروائیاں شروع کر رکھی ہے۔ زخمیوں کو ہنگو کے مختلف ہسپتالوں میں منقتل کردیا گیا ہے۔

واضح رہے کہ زرگری اورکزئی ایجنسی کی سرحد پر واقع ایک پہاڑی علاقہ ہے جہاں پر پولیس کی رِٹ نہ ہونے کے برابر ہے۔