شہزاد ملک بی بی سی اردو ڈاٹ کام، اسلام آباد

	نجکاری کمشن کے مطابق پی آئی کو بحران سے نکالنے کا نجکاری ہی حل ہے

سینیٹر نثار میمن کی صدارت میں ہونے والے اس اجلاس میں پاکستان مسلم لیگ کے سیکرٹری جنرل مشاہد حسین سید نے کہا کہ اگر پی آئی اے کے ان نفع بخش ہوٹلوں کے نجکاری ہوئی تو یہ ایک قومی المیہ ہوگا۔

ایک اور حکومتی سینیٹر جان محمد جمالی نے کہا کہ پی آئی اے کو پاکستان سٹیل ملز کی طرز پر نجکاری سے بچایا جائے، یہ نہ ہو کہ یہ معاملہ سپریم کورٹ میں چلا جائے۔

پیپلز پارٹی پارلیمنٹیرینز سے تعلق رکھنے والی سینیٹر رخسانہ زبیری نے کہا کہ اس حکومت کی مدت پوری ہونے والی ہے اور اب مزید نجکاری کا مینڈیٹ اس حکومت کے پاس نہیں ہے۔

نجکاری کمشن کے سیکرٹری احمد جواد نے کمیٹی کو بتایا کہ نجکاری کمشن، پی آئی اے، وزارت دفاع سمیت تمام متعلقہ اداروں نے پی آئی اے کو رقم فراہم کرنے اور مالی بحران سے نکالنے کے لیے دونوں ہوٹلوں کی نجکاری کا اصولی فیصلہ کر لیا ہے۔

	حکومت چاہتی ہے کہ پی آئی کے بیرون ملک ہوٹلوں کو بیچ دیا جائے

جماعت اسلامی سے تعلق رکھنے والے سینیٹیر پروفیسر خورشید احمد نے کہا کہ روزویلٹ ہوٹل کی فروخت میں جلد بازی کا مظاہرہ نہ کیا جائے۔ انہوں نے کہا کہ یہ قومی اثاثہ ہے اور اس کو قومی ملکیت میں ہی رہنا چاہئے۔

کمیٹی کے اجلاس میں شریک حکومتی اور حزب اختلاف سے تعلق رکھنے والے سینٹ کے ارکان نے کہا کہ ان ہوٹلوں کی نجکاری روکنے کے لیے ہمیں قرارداد لانے کے لیے وقت دیا جائے۔

چیئرمین نثار میمن نے کہا کہ قرارداد پیش نہ کی جائے بلکہ ان کو ویسے ہی ہدایات جاری کر دیتے ہیں جس پر کمیٹی کے ارکان اجلاس سے واک آؤٹ کرنے لگے تو مجلس قائمہ کے چیئرمین نے صورتحال کی نزاکت کو سمجھتے ہوئے نجکاری کمشن کو ہدایت کی کہ کمیٹی کے آئندہ اجلاس کے انعقاد تک پی آئی اے کے روز ویلٹ اور سکریب ہوٹل کی فروخت کے حوالے سے تمام اقدامات روک دیئے جائیں۔