عزیزاللہ خان بی بی سی اردو ڈاٹ کام کوئٹہ

	حز بِ اختلاف کی جماعتوں کا جلسہ

پشتونخواہ ملی عوامی پارٹی کے صوبائی صدر عثمان کاکڑ نے کہا ہے یہ جلسہ فوجی حکومت کے خاتمے، حقیقی جمہوریت کے قیام اور فوج اور ایجنسیوں کا حکومت میں کردار کے خاتمے کے خلاف منعقد ہو رہا ہے۔

سیاسی جماعتوں کے قائدین جیسے حزب اختلاف کے مولانا فضل الرحمٰن عوامی نیشنل پارٹی کے لیڈر اسفندیار ولی خان پشتونخواہ ملی عوامی پارٹی کے چیئر مین محمود خان اچکزئی پاکستان مسلم لیگ کے راجہ ظفر الحق اور اقبال ظفر جھگڑا کے علاوہ پروفیسر ساجد میر سید منور حسن ڈاکٹر قادر مگسی وغیرہ کوئٹہ پہنچ گئے ہیں۔

بلوچستان نیشنل پارٹی نے جمعیت علماء اسلام اور تحریک کے ایجنڈے میں بلوچستان کے حوالے سے اپنے تحفظات کے باوجود تحریک میں شرکت کا اعلان کیا ہے۔ جمہوری وطن پارٹی کے براہمدغ کے دھڑے نے اس تحریک میں جمعیت علماء اسلام کی موجودگی کی وجہ سے شرکت سے انکار کیا ہے۔

نواب اکبر بگٹی کے بیٹے جمیل اکبر بگٹی نے کوئٹہ میں ایک اخباری کانفرنس میں کہا ہے کہ جمعیت علماء اسلام اس حکومت کا حصہ ہے جس نے بلوچستان میں فوجی آپریشن کی اجازت دی ہے اور اس آپریشن میں نواب اکبر بگٹی ہلاک ہو ئے ہیں۔ انہوں نے کہا ہے کہ ایک طرف جمعیت سرحد اور بلوچستان میں حکومت کا حصہ ہے اور دوسری جانب حزب اختلاف کا حصہ بن رہے ہیں جس سے ان کا دوغلا پن ظاہر ہوتا ہے۔

ادھر پاکستان مسلم لیگ کے لیڈر اقبال ظفر جھگڑا نے نواب اکبر بگٹی کے بڑے بیٹے طلال بگٹی سے بگٹی ہاؤس میں ملاقات کی ہے ۔ طلال اکبر بگٹی جمہوری وطن پارٹی کے دوسرے دھڑے کی قیادت کر رہے ہیں۔

یاد رہے چھبیس اگست کو نواب اکبر بگٹی کی پہلی برسی ہے جس کے لیے براہمدغ بگٹی نے بلوچستان میں شٹر ڈاؤن اور پہیہ جام ہڑتال کا اعلان کر رکھا ہے جس کی حمایت بلوچستان نیشنل پارٹی مینگل گروپ نے کی ہے۔ جمیل بگٹی نے تمام ٹرانسپورٹرز، تاجروں اور وطن دوست سیاسی جماعتوں سے ہڑتال کامیاب کرنے کی اپیل کی ہے۔