ہارون رشید بی بی سی اردو ڈاٹ کام، اسلام آباد

	تین کروڑ ووٹروں کا تیس دن میں اندراج اور تصدیق انتہائی مشکل ہے

ایوان میں وقفہ سوالات میں متحدہ مجلس عمل کی رکن سمیعہ راحیل قاضی کے ایک سوال کا جواب دیتے ہوئے وفاقی وزیر نے کہا کہ تین کروڑ ووٹروں کا تیس دن میں اندراج اور تصدیق انتہائی مشکل ہے۔

تیس دن میں ہر ووٹر کا اندراج یقینی

ان کا کہنا تھا کہ الیکشن کمیشن نے اس کام کے لیے حکومت سے ایک سو چالیس دن کا وقت مانگا تھا۔ ’اللہ کرے کہ وہ کر لیں لیکن مشکل دکھائی دیتا ہے‘۔

وفاقی وزیر نے اپنے خدشات کا اظہار کرتے ہوئے کہا کہ اس بات کا قوی احتمال ہے کہ جلدی میں کہیں کم عمر افراد کا بطور ووٹر اندارج نہ ہو جائے یا ایک شخص ایک سے زیادہ مقامات پر اپنا ووٹ رجسٹر نہ کرا لے۔

بیگم سمیعہ راحیل قاضی نے وزیر پارلیمانی امور سے دریافت کیا تھا کہ آیا ملک میں نئی انتخابی فہرستوں کے لیے کوئی ڈسپلے سنٹر قائم کرنے کی کوئی تجویز ہے۔ تو شیر افگن نے بتایا کہ ایسی کوئی تجویز حکومت کے زیر غور نہیں۔

اس سوال کے بعد ایوان میں اس آئندہ انتخابات سے قبل اس اہم موضوع پر جیسے ایک بحث کا آغاز ہوگیا۔

سرکاری بینچوں سے بھی اراکین نے جن میں ریاض حسین پیرزادہ فاروق اعظم نے بھی ووٹروں کے اندارج کو سہل بنانے کا مطالبہ کیا۔

سابق وزیر اعظم میر ظفر اللہ خان جمالی نے اس موقع پر کہا کہ یہ ایوان پانچ سال مکمل کرنے والا ہے لیکن آج تک جعلی ڈگریوں کی بنیاد پر منتخب ہونے اراکین کو نہیں نکال سکے تو جعلی ووٹر تو دور کی بات ہے۔

پیپلز پارٹی کی ناہید خان نے نکتہ اعتراض پر جب حکومت کی جانب سے جسٹس ریٹائرڈ قیوم کی بطور اٹارنی جنرل تقرری پر تنقید کرنا شروع کی تو سپیکر نے ان کا مائیک بند کروا دیا جس پر انہوں نے دیگر جماعتی اراکین کے ساتھ ایوان سے احتجاج کرتے ہوئے واک آوٹ کیا۔

ایوان میں ابتدا میں کارروائی کورم کی کمی کے باوجود جاری رکھی گئی اور کسی نے بھی اس کی نشاندہی نہیں کی۔

سپیکر چوہدری امیر حسین نے بعد میں اجلاس بدھ کی شام پانچ بجے تک ملتوی کر دیا۔