دلاور خان وزیر بی بی سی اردو ڈاٹ کام ڈیرہ اسماعیل خان

	اغواء کاروں کے چہروں پر نقاب تھے

بنوں پولیس کے سربراہ دار علی خٹک نے بی بی سی کو بتایا کہ بنوں سے کوئی بیس کلومیٹر دور شمال کی جانب ایف سی کے چار اہلکار ایک سرکاری گاڑی میں معمول کی گشت کر رہے تھے کہ درے غونڈئی کے مقام پر مسلح نقاب پوشوں نے ان کا راستہ روک کران کو اغواء کرلیا۔ دار علی کے مطابق اغواء کار سرکاری گاڑی بھی اپنے ساتھ لے گئے ہیں۔

انہوں نے کہا کہ پولیس کو شبہ ہے کہ ایف سی کے اہلکاروں کو شمالی وزیرستان کے علاقے میں لیجایا گیا ہے۔ پولیس کے مطابق اغواءکاروں کی تعداد پندرہ سے زیادہ تھی اور وہ سب مسلح تھے اور ان کےچہروں پر نقاب تھے۔

ایک عینی شاہد عبداللہ نے بی بی سی کو بتایا کہ اغواء کاروں نے جیسے ہی ایف سی کے اہلکاروں پر بندوقیں تانیں تو انہوں نے فوراً ہی ہتیھار ڈال دیے اور ان کے ساتھ جانے کوتیار ہوگئے۔

یاد رہے کہ اس سے پہلے بھی کئی سرکاری اہلکار اغواء ہوچکے ہیں جن میں بعض کو اغواکاروں نےمار دیا تھا تین روز پہلے میرعلی سے نامعلوم نقاب پوشوں نے انٹیلیجنس بیورو کے ایک افسر کو اغواء کیا تھا۔ جن کا ابھی تک کچھ پتہ نہیں چل سکا۔