ریاض سہیل بی بی سی اردو ڈاٹ کام، کراچی

	پولیس نے صرف تین ملزم گرفتار کئے ہیں چار ملزم مفرور ہیں

اس سلسلے میں کراچی پولیس کے سربراہ اظہر فاروقی کا کہنا ہے کہ کہ پولیس لائینز پولیس اہلکاروں کی سرکاری رہائش گاہ ہے اور نسیمہ لبانو پولیس میں نہیں ہیں۔

ان کا کہنا تھا کہ یہ جگہ عارضی بنیادوں پر انہیں پندرہ دن کے لئے دی گئی تھی اور اب چار ماہ ہوگئے ہیں۔ نسیمہ لبانو اور ان کے گھر والوں کو مکان خالی کرنے کے لیے کہا گیا تھا مگر وہ نہ مانے اس لیے سنیچر کو پولیس نے مکان خالی کروا لیا ہے۔

سندھ کے گورنر ڈاکٹر عشرت العباد کے حکم پر فروری میں مبینہ اجتماعی زیادتی کا شکار ہونے والی پندرہ سالہ نسیمہ لبانو کو خاندان سمیت تیرہ فروری کو کراچی منتقل کیا گیا تھا اور انہیں پولیس لائینز میں سرکاری رہائش گاہ فراہم کی گئی تھی۔

نسیمہ کا کہنا تھا کے ان سے زیادتی کرنے والے سات افراد میں سے پولیس نے صرف تین ملزم گرفتار کیے ہیں، چار ملزم مفرور ہیں اور جو ملزم گرفتار ہیں وہ دھمکیاں بھیج رہے ہیں۔

دو کمروں کے فلیٹ میں نسیمہ اپنے والد، والدہ اور بہن بھائیوں سمیت رہ رہی تھیں، ان کا سوال تھا کہ انہیں معلوم نہیں وہ دس افراد اب بے گھر ہونے کے بعد کہاں جائیں۔

نسیمہ کے والد حمزہ لبانو کا کہنا ہے کہ انہیں پولیس حکام نے یہ کہہ کر گھر خالی کروایا ہے کہ آپ یہاں نہیں رہے سکتے۔

نسیمہ لبانو سے زیادتی کے بعد انسانی اور حقوق نسواں کی تنظیموں نے بھی سخت احتجاج کیا تھا۔ تنظیموں نے ان کے خاندان کی کیا مدد کی، اس بارے میں حمزہ لبانو بتاتے ہیں کہ این جی اوز نے انہیں صرف گھر کا راشن فراہم کیا تھا مزید کوئی مدد نہیں کی گئی۔

	فلیٹ میں نسیمہ اپنے والد، والدہ اور بہن بھائیوں سمیت رہ رہی تھیں

ان کا کہنا تھا کہ آخر ان سے کیوں انصاف نہیں کیا جاتا؟ کیا اس کی وجہ یہ ہے کہ وہ غریب ہیں؟ نسیمہ کے بقول انہیں کہا جا رہا ہے کہ واپس جا کر آپس میں صلح کریں مگر ان کا کہنا تھا کہ ہم ملزمان سے کبھی صلح نہیں کریں گے۔

نسیمہ لبانو واقعے کے بعد ابھی تک خوف میں مبتلا ہیں۔ ان کا کہنا تھا کہ جو ملزم مفرور ہیں وہ ان سے ڈرتی ہیں اس لیے وہ کسی صورت واپس اوباڑو نہیں جائیں گی۔