دلاور خان وزیر بی بی سی اردو ڈاٹ کام، ڈیرہ اسماعیل خان

	جنوبی وزیرستان اور شمالی وزیرستان میں گزشتہ کئی سالوں سے ٹی وی اور سی ڈی کا استعمال بہت کم رہا ہے

پمفلٹ کی تحریر اردو زبان میں ہے جس کا عنوان ہے ’ایک ضروری اعلان‘۔ پمفلٹ میں وانا بازار کے علاوہ کئی دوسرے بازاروں کا ذکر بھی کیا گیا ہے جس میں اعظم ورسک، شاہ عالم، رغزائی، کڑیکوٹ، انگوراڈہ کے بازار شامل ہیں۔

پمفلٹ میں بتایا گیا ہے کہ وانا اور ملحقہ علاقوں میں ٹی وی اور سی ڈی پر مکمل پابندی ہوگی اور کسی کو یہ اجازت نہیں ہوگی کہ وہ بیس جون کے بعد ٹی وی یا سی ڈی کا استعمال کرے۔

پمفلٹ کو مجاہدین وزیرستان اور امن کمیٹی کی جانب سے شائع کیا گیا ہے اور اسے پیر کو وانا بازار کی دیواروں پر چسپاں کیا گیا۔ پمفلٹ میں امیر کا نام محمد قاسم لکھا گیا ہے۔

جنوبی وزیرستان اور شمالی وزیرستان میں گزشتہ کئی سالوں سے ٹی وی اور سی ڈی کا استعمال بہت کم رہا ہے اور بازاروں میں سی ڈی کی دکان نہ ہونے کے برابر ہے۔ علاقے سے یہ اطلاع بھی ملی ہے کہ اس پمفلٹ کے شائع ہونے کے بعد دکانداروں نے اپنی دکانوں سے ٹی وی وغیرہ ہٹا دیے ہیں۔