امداد علی سومرو لاہور

	آسا کو بھی اکہتر کی جنگ کے دوران لاپتہ ہوجانے والے فوجی رشتہ دار کی تلاش ہے

گربیر سنگھ گِل کی سربراہی میں جمعہ کے روز پاکستان آئے ہوئے وفد میں جوان بوڑھے، مرد اور عورتیں شامل ہیں۔ یہ لوگ پندرہ روز تک پاکستان کی مختلف جیلوں کا دورہ کریں گے۔

سنگھ گِل نے بتایا ایسے جنگی قیدیوں کی تعداد پچاس سے زیادہ ہے جن کو ان کے خاندان والے چھتیس برسوں سے تلاش کر رہے ہیں۔ لیکن ویزہ صرف چودہ لاپتہ افراد کے ورثاء کو ملا ہے اس لیے دوسرے لواحقین نہیں آ سکے۔

ان کا کہنا تھا کہ کئی قیدی مختلف اوقات پر اپنے گھر والوں کو پیغامات بھی بھیجتے رہے ہیں جس کی وجہ سے ان کے ورثاء کو یہ یقین ہے کہ ان کے پیارے پاکستانی جیلوں میں ہیں۔

	ریشماں: میں یہ امید لے کر پاکستان آئی ہوں کی یہاں سے اپنے بچھڑے ہوئے رام کو لے لر جاؤں گی۔

حیدرآباد سندھ میں پیدا ہو کر تقسیم کے بعد اپنے خاندان کے ساتھ بھارت ہجرت کر جانے والی ریشماں کا کہنا تھا کہ رام اکثر کہا کرتے تھے کہ جب بھی جنگ کے دوران پکڑا گیا تو اپنا نام شانتی لعل بتاؤں گا اور میں نے ریڈیو پر بھی یہ ہی سنا تھا کہ فلائٹ لیفٹیننٹ شانتی لعل کو پاکستانی فوج نے پکڑ لیا ہے۔

انہوں نے بتایا کہ رام کے پکڑے جانے کے کوئی پانچ ماہ بعد ان کو ایک بیٹی ہوئی جس نے ابھی تک اپنے باپ کی شکل تک نہیں دیکھی۔ ’میں یہ امید لے کر پاکستان آئی ہوں کی یہاں سے اپنے بچھڑے ہوئے رام کو لے لر جاؤں گی۔‘

بھرت کمار سوری اپنے بھائی اے کے سوری کی تلاش میں آئے ہیں۔ ان کاکہنا تھا کہ ان کے والد سن تراسی میں بھائی کی تلاش میں پاکستان آئے تھے لیکن یہاں سے مایوس ہو کر گئے۔

کمار سوری نے بتایا کہ سن دوہزار میں انہیں پتہ چلا کہ ان کا بھائی پاکستان کی ایک جیل میں ہے مگر مشکل یہ ہے جب ان سے رابطے کی کوشش کی گئی تو پتہ چلا کہ ان کی جیل تبدیل ہوگئی ہے۔

بھارت سے آئے ہوئے وفد کے ارکان سنیچر کے روز کوٹ لکھپت جیل لاہور میں اپنے پیاروں کو تلاش کرنے کے بعد تین جون کو کراچی، سکھر، ملتان، ساہیوال، فیصل آباد، راولپنڈی، صوابی اور درگئی کے جیلوں میں جا کر اپنوں کو ڈھونڈنے کی کوشش کریں گے۔

بھارت سن اکہتر کی جنگ میں اپنے فوجیوں کے لاپتہ ہونے کے بعد مسلسل پاکستان پر یہ الزامات عائد کرتا رہا ہے کہ پاکستان نے ان کو جنگی قیدی بنا کر اپنے ملک کے جیلوں میں بند کر رکھا ہے۔ جبکہ پاکستان ہمیشہ ایسے الزامات کی تردید کرتا رہا ہے۔

صدر جنرل پرویز مشرف کے بھارتی دوروں کے دوران بھی لاپتہ افراد کے خاندانوں کے افراد نے شدید احتجاج کیا تھا جس کے بعد صدر جنرل پرویز مشرف نے ذاتی دلچسپی کا مظاہرہ کرتے ہوئے ایسے قیدیوں کی پاکستانی جیلوں میں تلاش کروائی تھی اور بھارت کو بتایا گیا تھا کہ پاکستان میں کوئی بھی بھارتی جنگی قیدی نہیں ہے۔

تاہم ایسے مبینہ جنگی قیدیوں کے خاندانوں نے پاکستانی حکومت کی اس وضاحت کو تسلیم کرنے سے انکار کر دیا تھا جس کے بعد جنرل مشرف نے ان کو یہ پیشکش کی تھی کہ خاندان کے افراد خود پاکستان آکر اپنے پیاروں کو تلاش کر سکتے ہیں۔