ہارون رشید بی بی سی اردو ڈاٹ کام، اسلام آباد

	حکومت کا علاقے میں سکیورٹی فورسز کی تعداد بڑھانے کا بھی ارادہ ہے

وزارت داخلہ کے ذرائع کےمطابق اس منصوبے پر ایک ارب چار کروڑ روپے خرچ ہوں گے۔

منصوبے کے تحت رہائشی، دفتری اور تربیتی عمارتیں قبائلی علاقوں میں سات مقامات پر تعمیر کی جائیں گی۔ جن میں ورسک، رزمک، پارہ چنار اور ثمر باغ کے علاقے شامل ہیں۔

دو برسوں میں اس منصوبے کو مکمل کیا جائے گا جس کی منظوری گزشتہ دنوں منصوبہ بندی کمیشن بھی دے چکا ہے۔

سرکاری خبر رساں ادارے اے پی پی نےایک سرکاری اہلکار کے حوالے سے بتایا ہے کہ ان نئی تعمیرات کا مقصد ان علاقوں میں تعینات فوجیوں کو اپنی پیشہ ورانہ ذمہ داریوں کی ادائیگی میں سہولت مناسب رہائشی اور دفتری جگہوں کی صورت میں فراہم کرنا ہے۔

یہ تعمیرات بنیادی طور پر اس علاقے میں سرحد اور امن عامہ کی نگرانی کرنے والی نیم فوجی ملیشیا سوات سکاؤٹس، کرم ملیشیا، شوال رائفلز، دیر سکاؤٹس اور نئی قائم کی جانے والی ٹل سکاؤٹس کے لیے ہوں گی۔

اس منصوبے کے تحت ونگ کمانڈر کے دفاتر، کمانڈر کی رہائش گاہ، کواٹر گارڈز، آفیسرز میس، بیرکیں، ڈائنگ ہال، اسلحہ ڈیپو، سڑکیں اور ٹیوب ویل تعمیر کیئے جائیں گے۔

سرکاری ذرائع کے مطابق حکومت کا علاقے میں سکیورٹی فورسز کی تعداد بڑھانے کا بھی ارادہ ہے۔

پاکستان نے گیارہ ستمبر دو ہزار ایک کے حملوں کے بعد پہلی مرتبہ باقاعدہ فوج قبائلی علاقوں میں سرحد کی نگرانی کے لیے تعینات کی تھی جس کی تعداد اب بڑھ کر اسی ہزار سے زائد ہوچکی ہے۔