ریاض سہیل بی بی سی اردو ڈاٹ کام، کراچی

	اجلاس میں کراچی میں ہونے والی قتل وغارت کی مذمت کی گئی اور جمعہ کے روز احتجاج کا اعلان کیا گیا

اس احتجاج کا فیصلہ کراچی میں متحدہ مجلس عمل کی سپریم کاؤنسل کے اجلاس میں کیا گیا۔ اجلاس کی صدارت قاضی حسین احمد نے کی جبکہ مولانا فضل الرحمان سمیت اتحاد میں شامل دیگر جماعتوں کے رہنماؤں نے بھی شرکت کی۔

اجلاس میں بارہ مئی کو کراچی میں ہونے والی قتل وغارت کی مذمت کی گئی اور جمعہ کے روز پورے ملک میں احتجاج کا اعلان کیا۔

اجلاس میں جمعہ کے روز قومی مجلس مشاورت کے انعقاد کا بھی اعلان کیا گیا۔

قاضی حسین احمد اور مولانا فضل الرحمان نے اجلاس کے بعد پریس کانفرنس سے خطاب کرتے ہوئے کہا کہ بارہ مئی کے واقعات کو فرقہ وارانہ اور لسانی تصادم بننے نہیں دیں گے اور ان عناصر کو بے نقاب کریں گے جو یہ چاہتے ہیں۔

قاضی حسین احمد نے بتایا کہ مجلس مشاورت میں شریک ہونے کے لیے تمام اپوزیشن جماعتوں کو دعوت دی گئی ہے مگر پی پی پی نے اس میں شرکت سے معذرت کی ہے۔

انہوں نے کہا کہ پاکستان پیپلز پارٹی خود کو اپوزیشن سے الگ نہ کرے۔

قاضی حسین احمد کا کہنا تھا اپوزیشن کا گرینڈ الائنس بنانے کے لیے بھی رابطے جاری ہیں۔

اس سے قبل دوپہر کو دونوں رہنماؤں نے کراچی بار سے خطاب کیا۔

پشتون ایکشن کمیٹی کی جانب سے بھی جمعہ کو روز ہڑتال کا اعلان کیا گیا جو حکومتی یقین دہانیوں کے بعد چودہ روز تک ملتوی کر دی گئی ہے۔