عزیزاللہ خان بی بی سی اردو ڈاٹ کام، کوئٹہ

	سرحدی علاقوں میں مبینہ جرائم پیشہ گروہوں کے خلاف کارروائی جاری ہے

تربت سے پولیس انسپکٹر محمد کریم حسنی نے بتایا ہے کہ مذکورہ کارروائی مکران ڈویژن میں مند کے علاقے سلمب میں کی گئی، جہاں جرائم پیشہ افراد روپوش تھے۔

پولیس اور فرنٹیئر کور کی اس مشترکہ کارروائی میں چار مشتبہ افراد ہلاک ہوئے جبکہ جرائم پیشہ افراد کی جوابی فائرنگ کے نتیجے میں فرنٹیئر کور کے ایک صوبیدار جان سے ہاتھ دھو بیٹھے۔

حکام نے ہلاک ہونے والے مبینہ جرائم پیشہ افراد کے تین ساتھیوں کی گرفتاری کا دعویٰ بھی کیا ہے۔

پولیس کا کہنا ہے کہ پاک ایران سرحد پر یہ لوگ اغوا برائے تاوان اور دیگر جرائم میں ملوث تھے اور دونوں ممالک میں کارروائیاں کرتے رہتے تھے۔ پولیس کے مطابق ملزمان ایران میں کارروائی کے بعد بلوچستان کے سرحدی علاقوں اور مکران ڈویژن میں کارروائی کے بعد ایرانی سرحدی علاقوں میں روپوش ہو جاتے تھے۔

گزشتہ دنوں دونوں ممالک کے سرحدی علاقوں میں جرائم پیشہ افراد کی کارروائی کے بعد ملزمان کی گرفتاریوں کے لیے کوششیں تیز کر دی گئی تھیں۔

یاد رہے مکران ڈویژن میں اغواء برائے تاوان کے واقعات میں اضافہ ہو گیا تھا، جس پر مقامی لوگوں میں تشویش پائی جا تی تھی۔

	جرائم پیشہ گروہ پاک ایران سرحد پر اغوا برائے تاوان کی وارداتوں میں ملوث ہیں

ادھر بلوچستان کے شہر کاہان اور دشت کے قریبی علاقوں سے فوجی کارروائی کی اطلاعات ہیں جس میں دو خواتین سمیت نو افراد زخمی ہوئے ہیں، لیکن سرکاری سطح پر اس کی تصدیق نہیں کی گئی۔

مری قبیلے کے لوگوں نے بتایا ہے کہ کاہان کے قریب پیشی سیاہ گرہ گمالان کچ اور دیگر علاقوں میں فضائی اور زمینی حملے کیے گئے ہیں جس میں دو خواتین ہلاک اور دو بچوں اور چار خواتین سمیت نو افراد زخمی ہوئے ہیں۔

ایسی اطلاعات بھی ہیں کہ حالیہ کارروائی کاہان کے قریب سکیورٹی فورسز کی گاڑی پر حملے کے نتیجے میں چار اہلکاروں کی ہلاکت کے بعد شروع کی گئی ہے۔