عزیزاللہ خان بی بی سی اردو ڈاٹ کام، کوئٹہ

	پاکستان میں لاپتہ افراد کی بازیابی کے لیے مظاہرے ہوتے رہے ہیں(فائل فوٹو)

تربت کے مرکزی چوک پر پانچ خواتین اور بچوں نے علامتی بھوک ہڑتالی کیمپ لگایا ہے۔

ان خواتین کا کہنا ہے کہ بلوچستان نیشنل موومنٹ کے سربراہ چار ماہ سے لاپتہ ہیں اور اب تک ان کے بارے میں کچھ علم نہیں ہے کہ وہ کہاں ہیں۔ بھوک ہڑتالی کیمپ میں موجود خاتون فاطمہ نے بی بی سی اردو سروس سے بات کرتے ہوئے کہا کہ غلام محمد بلوچ نے اگر کوئی جرم کیا ہے تو انہیں عدالت میں پیش کیا جائے۔

انہوں نے اقوام متحدہ اور دیگر بین الاقوامی تنظیموں سے اپیل کی کہ وہ پاکستانی حکمرانوں پر تمام لاپتہ افراد کو منظر عام پر لانے کے لیے دباؤ ڈالیں۔

دریں اثناء بلوچ مری قبیلے کے لوگوں نے کوئٹہ پریس کلب کے سامنے احتجاجی مظاہرہ بھی کیا ہے اور کہا ہے کہ ستائیس مارچ انیس سو سینتالیس کو بلوچستان کا پاکستان سے الحاق کیا گیا تھا لیکن اس وقت کیے گئے وعدوں پر عمل درآمد نہیں کیا گیا اور بلوچوں کو پنجابی حکمرانوں کا غلام بنا دیا گیا ہے۔