ریاض سہیل بی بی سی اردو ڈاٹ کام، کراچی

	سندھ ہائی کورٹ میں کئی لاپتہ افراد کی بازیابی کے لیے درخواستیں زیر سماعت ہیں۔

سندھ ہائی کورٹ کے جسٹس صبیح الدین احمد اور جسٹس فیصل عرب پر مشتمل بنچ کے سامنے اٹارنی جنرل مخدوم علی خان نے بتایا کہ قاری محمد عالم پنجاب میں انسداد دہشت گردی کے ایک مقدمے میں گرفتار ہیں جبکہ ممتاز رضوی کے بارے میں انہیں ٹیلی فون پر بتایا گیا ہے کہ وہ زیر حراست ہیں۔

اٹارنی جنرل نے عدالت سے مہلت طلب کی اور کہا کہ اگلی سماعت پر مزید تفصیلات سے آگاہ کیا جائے گا جس کو عدالت نے منظور کرتے ہوئے سماعت یکم مارچ تک ملتوی کردی۔

ممتاز رضوی کو ان کے خاندان کے مطابق دبئی سے واپسی پر کراچی ایئرپورٹ سے ایجنسی اہکاروں نے حراست میں لیا تھا جبکہ قاری محمد عالم کے بارے میں انسانی حقوق کمیشن کا کہنا ہے کہ انہیں دسمبر دو ہزار پانچ کو کراچی کے علاقے ملیر سے سادہ کپڑوں میں لوگ اپنے ساتھ لے گئے تھے۔

سندھ ہائی کورٹ میں دیگر دس لاپتہ افراد سمیت ممتاز رضوی اور محمد عالم کی بازیابی کے لیے درخواستیں زیر سماعت ہیں۔

ممتاز رضوی کی رہائی کے لیے کراچی میں شیعہ ایکشن کمیٹی نے نو محرم کو بھی احتجاجی دھرنا دیا تھا۔ حکام نے یقین دہانی کروائی تھی کہ ان کے بارے میں تفیصلات سے آگاہ کیا جائےگا۔

دوسری طرف حکومتِ پاکستان نےگوانتانامو میں قید ماجد خان کی گرفتاری سے لاعلمی کا اظہار کیا ہے۔

سندھ ہائی کورٹ کے چیف جسٹس صبیح الدین احمد اور جسٹس فیصل عرب کی عدالت میں اٹارنی جنرل مخدوم علی خان نے بتایا کہ ماجد خان کی گرفتاری حکومت کے علم میں نہیں ہے اور نہ ہی انہیں امریکہ کے حوالے کیا گیا ہے۔

عدالت نے حکم دیا کہ حکومت اپنی سہ ماہی رپورٹ میں عدالت کو حکومتی کاوشوں سے مطلع کرتی رہے۔ عدالت نے انہیں ہدایت کے ساتھ درخواست نمٹا دی ۔

ماجد خان کی بیگم رابعہ خان نے ان کی مبینہ گرفتاری اور امریکہ منتقلی کے خلاف درخواست دائر کی تھی۔