بیورو رپورٹ بی بی سی اردو ڈاٹ کام، اسلام آباد

	امریکی نائب وزیرخارجہ کا عدالتی بحران کے بارے رائے دینے کا کوئی ارادہ نہیں تھا

پیر کو وزارت خارجہ کی ترجمان تسنیم اسلم نے ہفتہ وار پریس بریفنگ کے دوران کہا کہ امریکی نائب وزیرخارجہ کا عدالتی بحران کے بارے میں رائے دینے کا کوئی ارادہ نہیں تھا بلکہ وہ محض صحافیوں کی جانب سے پوچھے گئے ایک سوال کا جواب دے رہے تھے۔

تسنیم اسلم نے صحافیوں کو مشورہ دیتے ہوئے کہا کہ انہیں پاکستان کے دورے پر آئے ہوئے عالمی رہنماؤں اور اعلی حکام سے ملک کے اندرونی معاملات سے متعلق سوالات نہیں کرنے چاہیں۔

رچرڈ باؤچر نے کہا تھا کہ پاکستان کا عدالتی بحران ایک حساس مسئلہ ہے اور پاکستان کی حکومت اسے اپنے طور پر حل کرے۔ تاہم انہوں نے کہا کہ امریکہ نےاس پرگہری نظر رکھی ہوئی ہے۔

عدالتی بحران سے متعلق عالمی میڈیا اور انسان حقوق کی تنظیموں کی طرف سے ردعمل پر تسنیم اسلم نے کہا کہ یہ ریفرنس عدالت میں زیرسماعت ہے اور وہ اس پر کوئی تبصرہ نہیں کرنا چاہیں گی۔

انہوں نے یہ بھی امید ظاہر کی ہے کہ عالمی میڈیا بھی اس بارے میں تبصروں سے اجتناب کرے گا۔

پاکستان کے کوچ باب وولمر کی وفات پر گہرے رنج و غم کا اظہار کرتے ہوئے تسنیم اسلم کا کہنا تھا کہ پاکستانی حکام نے ان کے اہل خانہ کے ساتھ رابطہ رکھا ہوا ہے اور ان کی اہلیہ کو ہر قسم کے تعاون کی پیشکش کی گئی ہے۔

پاکستان، ایران اور انڈیا پائپ لائن منصوبے سے متعلق ان کا کہنا تھا کہ اس سلسلے میں قیمت کے تعین کا اہم معاملہ حل ہوگیا ہے جبکہ باقی معاملات کا جائزہ لیا جا رہا ہے۔

سمجھوتہ ایکسپریس سے متعلق پوچھے گئے ایک سوال کے جواب میں تسنیم اسلم نے کہا کہ انڈیا کے سکریٹری خارجہ نے پاکستان کے حالیہ دورے کے موقع پر یقین دہانی کرائی تھی کہ تفتیش میں ہو نے والی پیش رفت سے پاکستان کو آگاہ کیا جائے گا لیکن تاحال معلومات کا تبادلہ نہیں کیاگیا ہے۔

پاکستان کی وزارت خارجہ کی ترجمان نے فلسطین میں قومی حکومت کے تشکیل کا خیر مقدم کرتے ہوئےاس امید کا اظہار کیا کہ عالمی برادری قومی حکومت کی کامیابی اور فلسطین کے معاشی مسائل کے حل میں مدد کرے گی۔