اعجاز مہر بی بی سی اردو ڈاٹ کام، اسلام آباد

	تاحال امریکہ نے پاکستان کے جوہری تعاون کے مطالبے کا کھل کر کوئی جواب نہیں دیا

امریکی سفارتخانے کی ترجمان نائیڈا ایمن نے بی بی سی سے بات کرتے ہوئے امریکی نمائندے کی ان ملاقاتوں کی تصدیق تو کی لیکن تفصیلات نہیں بتائیں اور کہا کہ رچرڈ باؤچر شام کو ذرائع ابلاغ کے کچھ نمائندوں سے خود بات چیت کریں گے۔

امریکی سفارتخانے کے ذرائع کا کہنا ہے کہ رچرڈ باؤچر نے چیف الیکشن کمشنر سے اپنی ملاقات میں پاکستان میں آئندہ عام انتخابات کو شفاف بنانے کے بارے میں بھی تفصیلی تبادلہ خیال کیا۔

ان کے مطابق امریکی نمائندے نے چیف الیکشن کمشنر سے پاکستان میں انتخابات کے طریقہ کار اور کمیشن کے دائرہ اختیار کے بارے میں بھی معلومات لیں۔

واضح رہے کہ گزشتہ ماہ پاکستان کے مختصر دورے کے دوران امریکی صدر جارج ڈبلیو بش نے پاکستان میں مضبوط جمہوری نظام کے قیام اور آئندہ انتخابات کو شفاف بنانے پر زور دیا تھا۔

امریکہ بظاہر تو عالمی اور علاقائی امور کے بارے میں پاکستان سے اپنے تعلقات پر زیادہ توجہ مرکوز رکھتا ہے لیکن اب انتخابات کے شفاف ہونے کے بارے میں دلچسپی لینے سے لگتا ہے کہ وہ اب ملک کے اندرونی معاملات میں بھی دلچسپی لے رہا ہے۔

امریکہ بظاہر تو عالمی اور علاقائی امور کے بارے میں پاکستان سے اپنے تعلقات پر زیادہ توجہ مرکوز رکھتا ہے لیکن انتخابات کے شفاف ہونے کے بارے میں دلچسپی لینے سے لگتا ہے کہ وہ اب ملک کے اندرونی معاملات میں بھی دلچسپی لے رہا ہے۔

بعض تجزیہ کاروں کا کہنا ہے کہ امریکہ کا پاکستان میں آئندہ سال ہونے والے عام انتخابات کو غیر جانبدار اور شفاف بنانے میں گہری دلچسپی لینے سے حزب اختلاف کی جماعتوں کو فائدہ پہنچے گا۔

رچرڈ باؤچر منگل کے روز پاکستان پہنچے تھے اور انہوں نےاُسی روز وزیر خارجہ خورشید محمود قصوری سے باضابطہ بات چیت کی تھی۔

اس بات چیت میں پاکستان نے زور دے کر کہا تھا کہ امریکہ بھارت کی طرح پاکستان کی بھی توانائی کی ضروریات پوری کرنے کے لیے انہیں شہری جوہری پروگرام کے لیے پیکیج پیش کرے۔

صدر مشرف نے بھی امریکی نائب وزیر سے ملاقات میں جہاں سویلین نیوکلیئر تعاون کا معاملہ اٹھایا وہاں دہشت گردی کے خلاف جنگ اور بھارت کے ساتھ جامع مزاکرات میں پیش رفت سے بھی مطلع کیا۔

تاہم تاحال امریکہ نے پاکستان کے جوہری تعاون کے مطالبے کا کھل کر کوئی جواب نہیں دیا اور وہ اپنے اس موقف پر قائم ہے جس میں صدر بش نے کہا تھا کہ بھارت اور پاکستان کی ضروریات مختلف ہیں اور جوہری پھیلاؤ کے حوالے سے دونوں کی تاریخ بھی مختلف ہے۔