بی بی سی اردو ڈاٹ کام، لاہور

	صحافیوں نے دیگر شہروں میں بھی احتجاجی مظاہرے کیے ہیں

تھانہ سٹی بہاولنگر میں درج ہونے والے مقدمے میں پندرہ صحافیوں کو براہ راست نامزد کیا گیا ہے جبکہ اس میں دیگر صحافیوں کا بھی ذکر ہے۔

صحافی اور وکلاء پر تشدد کی مذمت

صحافیوں کا یہ جلوس پہلے پریس کلب سے ضلعی کچہری گیا اور وکلاء کے ہڑتالی کیمپ میں شریک ہوا۔ بعدازاں صحافی جلوس کی شکل میں رفیق شاہ چوک تک گئے۔ صحافیوں نے احتجاجی بینر اور پوسٹر اٹھا رکھے تھے جن پر درج تھا: ’آزادی صحافت پر قدغن نامنظور‘ اور’صحافیوں پر ظلم و تشدد بند کرو‘۔ صحافی حکومت کے خلاف نعرے بازی بھی کررہے تھے۔

اگرچہ اسی نوعیت کے احتجاجی جلوس اور مظاہرے لاہور، اسلام آباد پشاور، کراچی اور گوجرانوالہ سمیت ملک کے مخلتف شہروں میں ہوئے ہیں لیکن مقدمہ ابھی تک صرف بہاولنگر کے صحافیوں کے خلاف درج کیا گیا ہے۔

پولیس کا کہنا ہے کہ شہر میں دفعہ ایک سو چوالیس نافذ تھی جس کے تحت جلسے جلوسوں پر پابندی ہے اور صحافیوں نے اس پابندی کی خلاف ورزی کی ہے۔

ابھی تک پولیس نے کسی صحافی کو گرفتار نہیں کیا تاہم بہاولنگر پریس کلب کے جنرل سیکرٹری شفیق خان نے بی بی سی کو بتایا ہے کہ انہوں نے احتجاج کے طورپر ازخودگرفتاری پیش کرنے کا فیصلہ کیا ہے۔

پیر کو پریس کلب میں تمام صحافی اکٹھے ہونگے اورصلاح مشورے کے بعد تھانے یا ضلعی پولیس افسر کے دفتر جاکرخود کوگرفتاری کے لیے پیش کردیں گے۔