عزیزاللہ خان بی بی سی اردو ڈاٹ کام، کوئٹہ

	مظاہرین بی این پی کے گرفتار قائدین کی رہائی کا مطالبہ کر رہے تھے (فائل فوٹو)

خضدار کے قریب واقع تحصیل وڈھ، بلوچستان نیشنل پارٹی کے سربراہ سردار عطاءاللہ مینگل کا آبائی شہر ہے جہاں بدھ کو وزیراعلیٰ بلوچستان جام محمد یوسف ایک گرڈ سٹیشن کا افتتاح کرنے گئے تھے۔ ان کی آمد کے موقع پر بی این پی اور بی ایس نے احتجاجی ریلی نکالی اور حکومت کے خلاف نعرہ بازی کی۔

پولیس نے ریلی پر لاٹھی چارج کیا اور چار افراد کو گرفتار کر لیا جبکہ بی ایس او کے رہنماؤں نے بتایا کہ ان کے ایک درجن کے قریب کارکن زخمی ہوئے ہیں۔

اس احتجاجی ریلی میں شامل مظاہرین بلوچستان نیشنل پارٹی کے گرفتار قائدین اور کارکنوں کی رہائی کا مطالبہ کر رہے تھے۔ اس وقت بی این پی کے لیڈر اور سابق وزیراعلیٰ بلوچستان سردار اختر مینگل سمیت بڑی تعداد میں جماعت کے قائدین اور کارکن صوبے کی مختلف جیلوں میں گرفتار ہیں۔

گزشتہ سال اگست میں نواب اکبر بگٹی کی ہلاکت کے بعد بلوچستان نیشنل پارٹی نے حکومتی رویے کے خلاف سخت موقف کا اظہار کرتے ہوئے اسمبلیوں سے استعفے پیش کر دیے تھے۔ تیس نومبر سے لشکر بلوچستان کے نام سے گوادر سے کوئٹہ تک لانگ مارچ کا اعلان کیا تو حکومت نے جماعت کے قائدین اور کارکنوں کی گرفتاریاں شروع کردیں تھیں۔