اعجاز مہر بی بی سی اردو ڈاٹ کام، اسلام آباد

	بلوچستان میں فوجی آپریشن کی تمام سیاسی جماعتیں مخالفت کرتی ہیں

یہ مطالبے ایک غیر سرکاری تنظیم ’ایکشن ایڈ‘ کی جانب سے تنازعہِ بلوچستان پر قومی مذاکرہ کے عنوان سے منعقد کردہ ایک پروگرام سے خطاب کرتے ہوئے حکومتی اور حزب مخالف کے اتحاد کی سیاسی اور قومپرست جماعتوں کے سرکردہ رہنماوں نے کیے۔

پیپلز پارٹی کے رضا ربانی، بلوچستان اسمبلی میں حزب مخالف کے رہنما کچکول علی، بلوچستان نیشنل پارٹی کے ولی کاکڑ، پشتونخواہ ملی عوامی پارٹی کےسینیٹر رضا محمد رضا اور دیگر نے کہا کہ فوجی حکمرانوں کی غلط پالیسیوں کی وجہ وفاق اور صوبوں میں خلیج بڑھ رہی ہے اور اگر اس کا فوری تدارک نہیں ہوا تو صورتحال صرف بلوچستان اور مرکز تک نہیں بلکہ تمام صوبوں تک پھیل سکتی ہے۔

حکمران مسلم لیگ کے سینیٹر ایس ایم ظفر نے بلوچستان میں جاری آپریشن کی مخالفت کی اور حکومت سے درخواست کی کہ آپریشن بند کیا جائے۔

بلوچستان میں فوجی کارروائی روکنے اور لاپتہ سیاسی کارکنوں کو منظر عام پر لانے کے حزب مخالف کے مطالبات کی حمایت کرتے ہوئے ڈپٹی چیئرمین سینیٹ جان محمد جمالی نے کہا کہ بلوچستان میں طاقت کے زور پر مسائل حل نہیں ہوں گے۔ انہوں نے کہا کہ آئندہ انتخابات میں حصہ لینے پر بینظیر بھٹو اور نواز شریف پر پابندی نہیں ہونی چاہیے۔

حکمران مسلم لیگ کے سیکریٹری جنرل سید مشاہد حسین نے کہا کہ صدر جنرل پرویز مشرف نے بلوچستان کے لیے اچھا ترقیاتی پیکیج دیا ہے اور عام معافی دینے کی بھی بات کی ہے۔ انہوں نے کہا کہ یہ مناسب وقت ہے کہ بات چیت شروع ہو اور معاملات مذاکرات سے طئے ہوں۔

ان کے مطابق بلوچستان کے متعلق پارلیمان کمیٹی کی سفارشات پر عمل ہورہا ہے اور صوبائی خود مختاری کے بارے میں اقدامات کیے جارہے ہیں اور آئندہ سال صوبائی خود مختاری سمیت آئین میں ترامیم کا ایک پیکیج لائے گی۔

حکمران مسلم لیگ کے سینیٹر ایس ایم ظفر نے بلوچستان میں جاری آپریشن کی مخالفت کی اور حکومت سے درخواست کی کہ آپریشن بند کیا جائے۔
انہوں نے کہا کہ پاکستان میں بسنے والے سب محب وطن ہیں اور کسی کو یہ حق نہیں ہے کہ وہ اپنے مخالف کو غدار قرار دے۔ ان کے مطابق کسی کو غدار قرار دینے کا اختیار عدالت کے پاس ہے۔

ان کے مطابق بدقسمتی سے تہتر کے آئین پر عمل نہیں ہوا اور اگر ایسا نہ ہوتا تو آج یہ مسائل نہیں ہوتے۔ ایس ایم ظفر نے کہا کہ صوبوں کو زیادہ سے زیادہ اختیارات دیے جائیں تو اس سے بھی بیشتر مسائل حل ہوسکتے ہیں۔

بلوچستان میں اگست کے آخر میں نواب اکبر بگٹی کی ہلاکت کے بعد یہ پہلا موقع ہے جس میں مرکزی اور صوبائی حکومت کے ساتھ ساتھ دونوں سطح کی حزب مخالف کی سیاسی اور قومپرست جماعتوں کے نمائندے مل بیٹھے ہیں۔