رفعت اللہ اورکزئی بی بی سی اردو ڈاٹ کام، پشاور

	حالیہ عرصے میں طالبان مزاحمت زور پکڑ گئی ہے

طالبان کے ترجمان قاری محمد یوسف نے جمعہ کو کسی نامعلوم مقام سے بی بی سی کو ٹیلیفون کر کے بتایا کہ ان اطلاعات میں کوئی حقیقیت نہیں کہ طالبان حکومت کے سابق وزیر دفاع ملا عبید اللہ اخوند کو پاکستانی حکام نے کوئٹہ سے حراست میں لیا ہے۔

ملا عبیداللہ کی گرفتاری پر ابہام

کوئٹہ میں کی جانے والی مذکورہ کارروائی اس لحاظ سے اہم ہے کہ گزشتہ پیر کو جب امریکہ کے نائب صدر ڈک چینی غیر اعلانیہ دورے پر پاکستان آئے تھے تو انہوں نے پاکستان پر زور دیا تھا کہ وہ دہشتگردی کے خلاف اپنی کارروائیاں تیز کرے۔

ترجمان نے بتایا کہ ’طالبان رہنما کی گرفتاری کی خبریں صرف بے بنیاد اطلاعات پر مبنی ہیں کیونکہ تاحال کسی نے بھی باضابطہ طور پر اس سلسلے میں کچھ نہیں کہا ہے جو اس بات کا ثبوت ہو۔ ان اطلاعات میں کوئی حقیقت نہیں۔‘

ان کا کہنا تھا کہ طالبان کے تمام قائدین افغانستان میں مقیم ہیں جبکہ پاکستان سے ان کی گرفتاری کا سوال ہی پیدا نہیں ہوتا۔ قاری یوسف نے مزید بتایا کہ کوئٹہ سے جو لوگ گرفتار کیے گئے ہیں وہ افغان تو ہوسکتے ہیں لیکن ان میں طالبان کا کوئی رہنما موجود نہیں تھا۔

طالبان ترجمان کا بیان  طالبان رہنما کی گرفتاری کی خبریں صرف بےبنیاد اطلاعات پر مبنی ہیں کیونکہ تاحال کسی نے بھی باضابطہ طورپر اس سلسلے میں کچھ نہیں کہا ہے جو اس بات کا ثبوت ہو۔ ان اطلاعات میں کوئی حقیقت نہیں۔

اس سلسلے میں بی بی سی بات کرتے ہوئے پاکستانی فوج کے حال ہی میں تعینات کیے جانے والے ترجمان میجر جنرل وحید ارشد نے کہا کہ اس خبر کا فوج کے ساتھ کوئی تعلق نہیں۔ ان کا کہنا تھا: ’میرے پاس اس سلسلہ میں کوئی اطلاع نہیں اس لیے اس کی تصیدق یا تردید کرنے کا کوئی سوال ہی نہیں پیدا ہوتا۔‘

جب میجر جنرل وحید ارشد سے پوچھا گیا کہ وہ ملا عبید اللہ اخوند کی گرفتاری کے بارے میں اخبارات میں شائع ہونے والی خبروں کے بارے میں کیا کہتے ہیں تو ان کا کہنا تھا کہ یہ سوال اخبارات سے پوچھا جانا چاہیئے۔

واضح رہے کہ افغانستان میں طالبان حکومت کے خاتمے کے بعد گزشتہ چھ سالوں کے دوران القاعدہ اور طالبان کے کئی اہم رہنماؤں کو پاکستان سے گرفتار کیا جاچکاہے۔

اس سے قبل خبر رساں ایجنسی رائٹرز نے پاکستان کے انٹیلیجنس افسروں کے حوالے سے یہ اطلاع دی تھی کہ کوئٹہ میں اس ہفتے کے شروع میں ایک مکان پر چھاپہ مارا گیا تھا جس میں ملا عبیداللہ کے علاوہ پانچ اور مشتبہ طالبان کو پکڑ لیا گیا۔

امریکی اخبار نیو یارک ٹائمز نے بھی دو پاکستانی اہلکاروں کا حوالہ دیتے ہوئے کہا ہے کہ ملا عبید اللہ اخوند کو پیر کے روز، جس دن امریکی نائب صدر ڈک چینی پاکستان کے دورے پر آئے تھے، کوئٹہ سے گرفتار کیا گیا تھا۔ نیو یارک ٹائمز نے لکھا ہے کہ یہ معلوم نہیں ہو سکا کہ ملا عبید اللہ کو ڈک چینی کے دورے سے پہلے، اس کے دوران یا بعد میں گرفتار کیا گیا۔