اعجاز مہر بی بی سی اردو ڈاٹ کام، اسلام آباد

	عمر احمد گھمن کا کہنا ہے کہ انہوں نے ذاتی وجوہ کی بنا پر استعفیٰ دے دیا ہے

حکمران مسلم لیگ کے ٹکٹ پر سیالکوٹ سے قومی اسمبلی کے رکن منتخب ہونے والے عمر احمد گھمن نے بی بی سی کو بتایا کہ انہوں نے ذاتی وجوہ کی بنا پر نہ صرف وزارت بلکہ اسمبلی کی رکنیت سے بھی استعفیٰ دے دیا ہے۔

وزیراعظم نے ان کی وزارت سے استعفیٰ تو قبول کرلیا ہے لیکن قومی اسمبلی کی رکنیت سے استعفیٰ قبول کرنا قانون کے مطابق سپیکر کے دائرہ اختیار میں آتا ہے۔

عمر احمد گھمن جو امریکہ میں پلے بڑھے ہیں اور دوہری شہریت بھی رکھتے ہیں، ان کا کہنا ہے کہ وہ سیاست چھوڑ کر واپس امریکہ جا رہے ہیں۔

انہوں نے اچانک مستعفی ہونے کے بارے میں وجوہات بتانے سے گریز کیا لیکن ان کے بعض قریبی ساتھیوں کا دعویٰ ہے کہ وزیراعظم شوکت عزیز سے ان کے شدید اختلافات پیدا ہوچکے تھے۔

ان کے دوستوں کے دعوے اپنی جگہ لیکن عمر گھمن کے مستعفی ہونے کے اصل حقائق کیا ہیں اس بارے میں حکومت کچھ بتاتی ہے اور نہ ہی فی الحال سابق وزیر۔