عزیز اللہ خان بی بی سی ادو ڈاٹ کام، کوئٹہ

	امان اللہ کنرانی نے گزشتہ روز شاہد بگٹی کے ساتھ استعفیٰ دے دیا تھا

نواب اکبر بگٹی کی ہلاکت کے بعداختلافات ابھر کر سامنے آئے تھے جس پر جمہوری وطن پارٹی کے جنرل سیکرٹری آغا شاہد بگٹی اور سیکرٹری اطلاعات امان اللہ کنرانی سمیت دیگر ارکان نے اپنے عہدوں سے استعفے دے دیے تھے۔

لیکن آج ایک اخباری کانفرنس میں انھوں نے کہا ہے کہ وہ اپنے استعفے پارٹی کے مفاد اور لوگوں کے اصرار پر واپس لے رہے ہیں۔

جماعت کے سیکرٹری اطلاعات امان اللہ کنرانی نے بی بی سی کو بتایا کہ یہ تاثر غلط ہے کہ وہ ذاتی مفادات یا سرکار کے دباؤ میں مستعفی ہوئے تھے اور اب استعفے واپس لے رہے ہیں۔

انھوں نے کہا کہ بعض اختلافات کی وجہ سے وہ مستعفی ہو گئے تھے لیکن جب کوئی اور سامنے نہیں آیا تو انھوں نے اپنے استعفے واپس لے لیے ہیں۔

اس اخباری کانفرنس میں نواب اکبر بگٹی کے بڑے صاحبزادے طلال بگٹی موجود تھے لیکن صوبائی اسمبلی کے اراکین موجود نہیں تھے۔

نواب اکبر بگٹی کے صاحبزادے جمیل اکبر بگٹی کا کہنا ہے کہ جمہوری وطن پارٹی کے تمام اراکین کو اسمبلیوں اور سینیٹ سے مستعفی ہو جانا چاہیے تھا۔ انھوں نے کہا کہ انھوں نے ان اراکین کے مستعفی ہونے کے بعد کہہ دیا تھا کہ یہ اپنے استعفے واپس لے لیں گے۔ جمیل بگٹی نے کہا کہ موجودہ عہدیدار پارٹی کو سرکار کی طرف لے جا رہے ہیں اور وہ خود نواب اکبر بگٹی کے وفادار ساتھیوں اور پارٹی کے کارکنوں سے مشورے کے بعد کوئی فیصلہ کریں گے۔

امان اللہ کنرانی نے کہا ہے کہ بگٹی خاندان کی افراد متفق ہو کر ایک فیصلہ کریں تاکہ نواب اکبر بگٹی کے مشن کو آگے بڑھایا جا سکے۔

ادھر آج خان آف قلات بلوچستان نیشنل پارٹی کے قائد سردار عطاءاللہ مینگل سے ملنے بلوچستان کے علاقے وڈھ پہنچے ہیں جہاں بلوچستان کی موجودہ صورتحال پر بات چیت ہوئی ہے۔ خان آف قلات کے طلب کردہ دو اہم جرگوں کے بعد قبائلی سردار سے ملاقات کو کافی اہمیت دی جا رہی ہے۔