عدنان عادل بی بی سی اردو ڈاٹ کام، لاہور

	بھارتی حکام تھر ایکسپریس چلانے کے لیے مختلف تاریخیں دیتے رہے ہیں

گزشتہ سال اگست میں معطل کی جانے والی تھر ایکسپریس کو دوبارہ چلانے کے لیے بھارتی حکام پاکستان کو اس سے پہلے تئیس دسمبر سنہ دو ہزار چھ اور اس سال دس فروری اور تین مارچ کی تاریخیں دے کر منسوخ کر چکے ہیں۔

سنیچر کو لاہور میں پریس کانفرنس کرتے ہوئے شیخ رشید احمد نے کہا کہ بھارت کی وزارت ریلوے نے تھر ایکسپریس کو پہلے دی گئی تاریخ تین مارچ کو چلانے سے انکار کرتے ہوئے کہا ہے کہ کھوکھرا پار، مونا باؤ سیکشن پر بھارتی علاقے میں ابھی تک سیلابی پانی کھڑا ہے جسے خشک ہونے میں وقت لگے گا۔

شیخ رشید احمد نے کہا کہ بھارتی حکام تھر ایکسپریس چلانے کے لیے مختلف تاریخیں دیتے رہتے ہیں۔ انہوں نے کہاکہ بھارت کے ریلوے حکام کوئی تاریخ دیتے ہیں جبکہ بھارت کی وزارت ریلوے کوئی اور بات کہتی ہے۔

	تھر ایکسپریس سندھ کے تقسیم شدہ خاندانوں کے درمیان رابطے کا اہم ذریعہ ہے

شیخ رشید احمدنے کہا کہ پاکستان نے اس سیکشن کی بحالی پر دو ارب روپے خرچ کیے ہیں اور ہم چاہتے ہیں کہ اس روٹ پر پہلے مسافر ٹرین چلے اور بعد میں مال گاڑی۔ پاکستان کے وفاقی وزیر ریلوے نے یہ بھی کہا کہ اگر بھارتی وزیر لالو پرساد یادیو تھر ایکسپریس سے پاکستان آئے تو وہ ان کے استقبال کے لیے تیار ہیں۔

کراچی اور سندھ میں مقیم تقسیم شدہ مسلمان خاندانوں کے لیے بھارت میں مقیم اپنے رشتے داروں سے ملنے جانے کے لیے اہمیت کی حامل تھر ایکسپریس گزشتہ سال فروری میں اکتالیس سال کی بندش کے بعد بحال کی گئی تھی تاہم چھ ماہ بعد اگست میں بھارت نے اس سروس کو یہ کہہ کر دو ماہ کے لیے بند کردیا تھا کہ بارشوں کے باعث جودھ پور مونا باؤ ریل پٹری زیر آب آ گئی ہے اور اسے مرمت کی ضرورت ہے۔