ادریس بختیار بی بی سی اردو ڈاٹ کام، اسلام آباد

	پرنب مکھرجی نےشوکت عزیز کو سارک کانفرنس میں شرکت کا دعوت نامہ بھی پہنچایا۔

وزیرِخارجہ بننے کے بعد یہ پرنب مکھرجی کا پہلا دورۂ پاکستان ہے۔

پاکستان پہنچنے پر بھارتی وزیرِ خارجہ کا کہنا تھا کہ دونوں ممالک کے درمیان جامع مذاکرات کے تین ادوار میں قابلِ ذکر ترقی ہوئی ہے۔ وزیراعظم پاکستان سے ملاقات کے بعد بھارتی وزیرِ خارجہ کا کہنا تھا کہ بھارت پاکستان کے ساتھ اچھے دوستانہ تعلقات رکھنا چاہتا ہے اور اس کے لیے وہ تمام اہم معاملات حل کرنے میں دلچسپی رکھتا ہے۔

ان کا کہنا تھا کہ وہ پاکستانی وزیراعظم کے اس خیال سے متفق ہیں کہ دونوں ممالک کے درمیان امن عمل کو دہشتگردی کے واقعات کے ہاتھوں یرغمال نہیں بننے دینا چاہیے۔

پرنب مکھرجی نے وزیراعظم شوکت عزیز کو اپریل میں دلی میں ہونے والی چودھویں سارک کانفرنس میں شرکت کا دعوت نامہ بھی پہنچایا۔ وہ اس دورے کے دوران اپنے پاکستانی ہم منصب خورشید محمود قصوری سے بھی ملاقات کر یں گے۔

پرنب مکھرجی نے دورۂ پاکستان کے آغاز پر پاکستانی صدر جنرل پرویز مشرف سے بھی ملاقات کی۔ ملاقات میں جنرل مشرف کا کہنا تھا کہ کشمیر، سیاچن اور سرکریک جیسے معاملات کے حل ہونے سے دونوں ممالک کے درمیان مزید تعاون کے مواقع پیدا ہوں گے۔

	پرنب مکھرجی اور خورشید قصوری کے درمیان بھی ملاقات ہوئی ہے

یاد رہے کہ گزشتہ برس صدر مشرف نے ایک ہندوستانی نجی ٹیلی ویژن سے انٹرویو میں کہا تھا کہ پاکستان کشمیر پر اپنا دعوٰی اس وقت چھوڑ سکتا ہے جب ہندوستان کشمیر سے اپنی فوج کو واپس بلا لے اور علاقےکو خود مختار ریاست قبول کر لے۔ اس پر ہندوستان کے وزیراعظم منموہن سنگھ نے کہا تھا کہ ہندوستان مسئلہ کشمیر کے حل کے لیے کسی بھی تجویز کا خیرمقدم کرتا ہے۔

امید کی جارہی ہے کہ جنوبی ایشیا کے دونوں حریف ممالک اس ملاقات سے مسئلہ کشمیر کے حل کے ساتھ ساتھ دیگر دوسرے تمام مسائل کے حل کے لئے کچھ متبادل تلاش کر سکتے ہیں۔