شکیل اختر بی بی سی اردو ڈاٹ کام، دلی

	ہوانا: صدر مشرف اور وزیراعظم منموہن سنگھ

اس بات چیت میں سب سے اہم موضوع دہشت گردی کے خلاف ایک مشترکہ طریقہ کار ہوگا۔ دونوں اہلکاروں کو ایک مشترکہ قابل عمل طریقہ کار وضع کرنا ہوگا جو ایک مشکل کام ہے۔

گزشتہ مہینے ہوانا میں پاکستانی صدر پرویز مشرف اور ہندوستان کے وزیراعظم منموہن سنگھ کی ملاقات کے بعد دہشت گردی کے خلاف ایک مشترکہ طریقہ کار تشکیل دینے کی بات کہی گئي تھی۔

گزشتہ جولائی میں ممبئی کی کئی ٹرینوں میں خونریز بم دھماکوں کے لیے ہندوستان نے پاکستان کو ذمہ دار قرار دیا ہے اور ہند پاک مذاکرات کا عمل معطل کر دیا تھا۔ پاکستان نے ان الزامات کو قطعی طور پر مسترد کردیا تھا لیکن ہندوستان اپنے الزام پر مضر ہے۔

’دھماکے آئی ایس آئی کی سازش‘

اس سلسلے میں مہاراشٹر پولیس کے سربراہ اور دہشت گرد سیل کے چیف نے وزارت داخلہ کو اپنی تفتیش کی تفصیلات پیش کردی ہیں۔ ہندوستان نے پاکستان کا ہاتھ ہونے سے متعلق مبینہ ثبوت امریکہ کے سامنے بھی رکھے ہیں اور کہا ہے کہ وہ یہ ثبوت پاکستان کو بھی دیگا۔ لیکن ابھی یہ واضح نہیں ہے کہ خارجہ سکریٹری کی سطح پر ہونے والی بات چیت میں یہ مبینہ ثبوت بھی رکھے جائیں گے یا نہیں۔

ادھر ہندوستانی پولیس نے جولائی کے بم دھماکوں کے سلسلے میں دس پاکستانی شہریوں کے خلاف انٹرپول سے ریڈ الرٹ جاری کرنے کی درخواست کر دی ہے۔ اس بات چیت سے پہلے پاکستان پر مزید دباؤ بڑھے گا۔

شیو شنکر مینن نے یکم اکتوبر سے خارجہ سکریٹری کا چارج سنبھالا ہے اور وہ یہ کہہ چکے ہیں کہ خود پاکستان بھی دہشت گردی کا شکار ہے۔ وزارت خارجہ کے اہل کاروں کا کہنا ہے کہ مسٹر مینن اپنے پاکستانی ہم منصب کے ساتھ مشترکہ طریقہ کار کی تشکیل کی پوری کوشش کرینگے۔ اس بات چیت میں یہ طے کرنے کی کوشش کی جائے گی کہ اس میں کس سطح کی نمائندگی ہوگی، کتنے لوگ شامل ہونگے اور اس کے کام کرنے کا طریقہ کار کیا ہوگا۔

تجزیہ کاروں کا خیال ہے کہ اس بات چیت میں وزیر اعظم منموہن سنگھ کے پاکستان کےمجوزہ دورے کی بھی ابتدائی تفصیلات طے کی جاسکتی ہیں۔