ریاض سہیل بی بی سی اردو ڈاٹ کام، کراچی

	رواں سال اہم فصلوں کی پیداوار میں غیر متوقع کمی ہوئی ہے: شمشاد اختر

یہ بات سٹیٹ بینک کی سالانہ رپورٹ میں بیان کی گئی ہے جو کہ بینک کی گورنر ڈاکٹر شمشاد اختر نے سنیچر کو ایک پریس کانفرنس میں جاری کی۔

مالی سال دو ہزار چھ میں ملک کی حقیقی مجموعی قومی پیداوار ساڑھ چھ فیصد سے زائد رہی ہے جو کہ اس شرح سے زیادہ ہے جس کی پاکستان کو خواہش ہے۔ بینک کے تخمینوں کے مطابق مالی سال دو ہزار سات میں یہ اضافہ سات فیصد تک پہنچ جائےگا۔

حقیقی مجموعی قومی پیداوار میں اس اضافے کے ساتھ ساتھ برآمدات اور پرائیویٹ سرمایہ کاری میں اضافہ ہوا ہے جس سے ممکن ہے کہ غربت کم کرنے میں مدد ملی ہے۔

رپورٹ میں کہا گیا ہے کہ مالی سال دو ہزار سات میں توسیعی مالیاتی پالیسی سے معشیت کو لاحق خطرات مزید بڑھ گئے ہیں۔ ایک جانب زبردست طلب کے باعث اس سے افراط زر کا دباؤ بڑھے گا جبکہ دوسری جانب حکومت کی زائد سرمائے کی ضرورت کے باعث سود کی شرحوں میں اضافے کے لئے دباؤ بڑھ سکتا ہے تاکہ معیشت پر بڑھتے ہوئے دباؤ کو کم سے کم کیا جاسکے۔

رپورٹ میں کہا گیا ہے کہ رواں مالی سال میں مالیاتی خسارے کی شرح مجموعی قومی پیداوار کا چار اعشاریہ دو (4.2) تھی جبکہ گزشتہ سال یہ شرح 3.3 فیصد تھی۔ اس خسارے کا ایک بڑا حصہ مرکزی بینک سے قرضوں کے ذریعے پورا کیا گیا تھا۔

صنعتی ترقی میں کمی  رپورٹ کے مطابق رواں مالی سال میں صنعتی ترقی کی شرح 5.9 فیصد رہی، جو گزشتہ سال کی 11.4 فیصد کی شرح سے کم ہے۔ یہ کمی جزوی طور بجلی کی پیداواری قیمتوں میں اضافے اور گیس فراہم کرنے والی کمپنیوں کو پہنچنے والے نقصانات اور بلوچستان میں بے چینی کے باعث ہوئی ہے۔ جس سے گیس کمپنیوں کے نیٹ ورک میں توسیع کے اثرات بھی زائل ہوگئے۔

رپورٹ کے مطابق رواں مالی سال میں صنعتی ترقی کی شرح 5.9 فیصد رہی، جو گزشتہ سال کی 11.4 فیصد کی شرح سے کم ہے۔ یہ کمی جزوی طور بجلی کی پیداواری قیمتوں میں اضافے اور گیس فراہم کرنے والی کمپنیوں کو پہنچنے والے نقصانات اور بلوچستان میں بے چینی کے باعث ہوئی ہے۔ جس سے گیس کمپنیوں کے نیٹ ورک میں توسیع کے اثرات بھی زائل ہوگئے۔

بینک کے مطابق رواں سال پاکستان کے مجموعی قرضے اور واجبات میں مسلسل دوسرے سال بھی معمولی اضافہ ہوا۔ اس سال مجموعی قرضہ 6.1 سے بڑہ کر 6.3 ہوگیا ہے ، رواں سال پاکستان نے 3.4 بلین ڈالرز کا نیا طویل المدت قرضہ حاصل کیا ہے جس میں 673 ملین ڈالرز کے قرضے زلزلے سے متاثرہ علاقوں کے لیے مختص کیے گئے۔

سالانہ رپورٹ کے مطابق تیل کی عالمی قیمتوں اور اشیائے صرف کی قیمتوں میں اضافے کے ساتھ ساتھ مجموعی طلب میں اضافے کے باعث رواں سال پاکستان کا بیرونی کھاتہ بدستور دباؤ کا شکار رہا۔ گزشتہ سال اس کھاتے کا خسارہ 1.5 بلین ڈالرز تھا جو اس سال بڑہ کر پانچ بلین ڈالرز ہوگیا ہے۔ یہ اب تک ہونے والے خساروں میں سب سے بلند سطح ہے۔