ہارون رشید بی بی سی اردو ڈاٹ کام، پشاور

	کمیشن کا کہنا ہے کہ مدرسے پرحملہ افغانستان سرحد کی جانب سے کیا گیا

پشاور ہائی کورٹ بارایسوسی ایشن کے تحقیقاتی کمیشن نے گزشتہ ہفتے باجوڑ مدرسے کا دورہ کیا اور اس سے متعلق پانچ صفحات پرمشتمل تفصیلی رپورٹ آج صوبائی دارالحکومت پشاور میں صحافیوں اور وکلاء کے سامنے پیش کی ۔

کمیشن کے سربراہ بیرسٹر باچا کا کہنا تھا کہ عینی شاہدین کے مطابق حملہ افغانستان کی سمت سے ہوا تھا۔ ان کا کہنا تھا کہ مقامی لوگوں کے مطابق پاکستانی ہیلی کاپٹر پچیس منٹ بعد وہاں پہنچے۔

رپورٹ کے مطابق مدرسے پرافغانستان کی جانب مغربی سمت میں درودیوار کو کافی نقصان پہنچا جبکہ پاکستانی سرحد کی جانب کے مکانات محفوظ رہے۔ انہوں نےایک بم پر لکھے چند نمبروں کا ذ کر بھی رپورٹ میں شامل کیا ہے۔

وکلاء کے مطابق مقامی لوگ بمباری کے بعد وہاں پہنچے تو کئی لاشوں کی شناخت ناممکن تھی۔ تاہم ان کے مطابق مرنے والوں کی عمریں آٹھ سے اٹھارہ برس کے درمیان تھیں۔انہوں نے کہا کہ انہیں کسی عسکری تربیت یا اسلحے کے کوئی آثار نہیں ملے۔

رپورٹ کے مطابق مدرسے پر افغانستان کی جانب مغربی سمت میں درودیوار کو کافی نقصان پہنچا جبکہ پاکستانی سرحد کی جانب کے مکانات محفوظ رہے۔ رپورٹ میں ایک بم پر لکھے چند نمبروں کا ذ کر بھی شامل ہے۔

کمیشن میں بیرسٹر باچا کے علاوہ، محمد خورشید خان، قیصر رشید خان، غلام نبی خان، کریم خان محسود اور احمد زیب خان شامل تھے۔

یہ پہلا آزاد وفد تھا جس نے مدرسہ ضیاءالعلوم تعلیم قرآن کا دورہ کیا تھا۔ حکومت نے اس علاقع میں صحافیوں کےداخلے پر پابندی عائد کر رکھی ہے۔

رپورٹ کے مطابق اس حملے کا بظاہر مقصد باجوڑ میں امن معاہدے کے لیے ماحول کو خراب کرنا تھا۔

اس موقعع پر وکلاء نے دو قرار دادیں بھی منظور کیں جن میں حکومتی موقف کو مسترد کر دیا گیا۔ پشاور ڈسٹرکٹ بارایسو سی اسشن کے صدر فدا گل کے مطابق حکومت نے مدرسے کی جوفلم دکھائی ہے وہ تورا بورا میں طالبان نے تیار کی تھی اور سی ڈیزپر دستیاب ہے۔

حکومت پاکستان کا مدرسے کے بارے میں موقف رہا ہے کہ وہاں خودکش حملوں کی تربیت دی جا رہی تھی اور اس جگہ پرانہوں نے ایک برس سے نظر رکھی ہوئی تھی۔ حکومت اس حملے میں بچوں کی ہلاکت کی بھی تردید کرتی ہے۔