رفعت اللہ اورکزئی بی بی سی اردو ڈاٹ کام پشاور

	دنیا جانتی ہے کہ حملہ امریکی اور اس کے اتحادیوں نے کیا: سراج الحق

مدرسے پر بمباری: ’اسی‘ ہلاک

سراج الحق نے وزرات سے مستعفی ہونے کا اعلان باجوڑ سے پشاور پہنچنے پر پشاور پریس کلب میں ایک ہنگامی پریس کانفرنس سے خطاب کرتے ہوئے کیا۔

صوبائی وزیر نے اس موقع پر کہا کہ ایک مکمل اسلامی انقلاب کی خاطر انہوں نے اپنے عہدے سے استعفی دیا ہے تاہم وہ صوبائی اسمبلی کے رکن کی حیثیت سے کام کرتے رہیں گے۔ انہوں نے الزام لگایا کہ مدرسے پر حملہ امریکی اور اسکی اتحادیوں نے کیا ہے کیونکہ وہ خود اس علاقے سے آرہے ہیں اورفوجی ترجمان شوکت سلطان کی بات میں کوئی حقیقت نہیں کہ کارروائی پاکستان نے کی ہے۔

انہوں نے کہا کہ شوکت سلطان اپنے ’آقا‘ کے کہنے پر واقعے کی ذمہ داری اپنے اوپر ڈال رہے ہیں حالانکہ ساری دنیا جانتی ہے کہ حملہ امریکہ اور ان کی اتحادیوں نے کیا ہے۔

واضع رہے کہ سراج الحق جماعت اسلامی صوبہ سرحد کے امیر بھی ہے۔ سینیئر صوبائی وزیر کے علاوہ ان کے پاس وزرات خزانہ اور پلاننگ اینڈ ڈیلوپمینٹ کے اضافی قلمدان بھی تھے۔

باجوڑ ایجسنی سے تعلق رکھنے والے متحدہ مجلس عمل کے رکن قومی اسمبلی صاحبزادہ ہارون رشید بھی اسمبلی کی رکنیت سے مستعفی ہوگئے ہیں۔

بی بی سی سے بات کرتے ہوئے ہارون رشید نے بتایا کہ حملہ امریکی طیاروں نے کیا ہے کیونکہ بقول ان کے پاکستانی سیکیورٹی فورسز اتنے سفاک اور ظالم نہیں کہ اپنے ہی معصوم لوگوں کو نشانہ بنائیں۔

انہوں نے کہا کہ اسی افراد کی ہلاکت کے بعد اخلاقی طورپر ان کو اسمبلی کا رکن رہنے کا کوئی حق نہیں پہنچتا لہذا انہوں نے اسمبلی کی رکنیت سے استعفی دے دیا ہے اور اپنا استعفی پارٹی سربراہ قاضی حسین احمد کو بھیج دیا ہے۔