اعجاز مہر بی بی سی اردو ڈاٹ کام، اسلام آباد

	امریکہ کا ساتھ دینے پر صدر مشرف پر خودکش حملے کیے گئے

افغانستان میں القاعدہ کے رہنماؤں کی موجودگی اور پاکستان کا جغرافیائی اعتبار سے اس کا پڑوسی ملک ہونے کی وجہ سے دہشت گردی کے خلاف عالمی جنگ نے اس کے کردار کا تعین صفِ اول میں کیا۔

افغانستان سے ملحقہ سرحدی علاقہ بھی عالمی شدت پسندوں کی آماجگاہ بنا رہا اور وہاں پہلی بار پاکستان فوج گئی۔

قبائلی علاقوں میں غیر متوقع فوجی کارروائی میں جہاں کئی جنگجو مارے گئے وہاں سکیورٹی فورسز کے درجنوں اہلکار بھی ہلاک ہوئے۔ بچے کھچے شدت پسندوں نے اپنی محفوظ آمجگاہ کو بچانے کے لیئے کوئی کسر باقی نہیں چھوڑی اور حتیٰ کہ انہوں نے صدر جنرل پرویز مشرف پر بھی دو بار ناکام مگر انتہائی خطر ناک جان لیوا حملے کیے۔

قبائلی علاقوں میں غیر متوقع فوجی کارروائی میں جہاں کئی جنگجو مارے گئے وہاں سکیورٹی فورسز کے درجنوں اہلکار بھی ہلاک ہوئے۔ بچے کھچے شدت پسندوں نے اپنی محفوظ آمجگاہ کو بچانے کے لیئے کوئی کسر باقی نہیں چھوڑی اور حتیٰ کہ انہوں نے صدر جنرل پرویز مشرف پر ناکام مگر انتہائی خطرناک اور جان لیوا حملے کیے۔

پاکستان میں موجود دس ہزار سے زائد دینی مدارس میں سے کئی سرفروش مجاہدین پیدا کرنے کی ’نرسری‘ کا کردار ادا کرتے رہے اور شاید یہی وجہ تھی کی پاکستان حکومت نے مدارس کے اصلاحات بھی شروع کیے۔

حکومت نے بیرونی امداد سے ماڈل مدارس کا قیام کیا اور بعض مدارس میں قرآن کے ساتھ ساتھ کمپیوٹر کی تعلیم بھی شروع کروائی۔ مدارس میں اصلاحات کا پروگرام تاحال اتنا تو کامیاب نہیں ہوسکا جتنی توقعات تھیں لیکن پھر بھی درست سمت میں ایک اہم قدم ثابت سمجھا جاتا ہے۔

نائن الیون واقعہ کے فوری بعد دنیا بھر کے ذرائع ابلاغ کے نمائندے جب پاکستان پہنچے تو ملک کے بیشتر بڑے ہوٹلز، رینٹ اے کار، مکانوں کے مالکان سمیت مختلف صنعتوں اور شعبوں سے وابستہ کاروباریوں کی جہاں چاندی ہوئی وہاں مقامی صحافیوں کی بھی قسمت جاگی اور کئی صحافی بھی لکھ پتی بن گئے۔

اس واقعہ سے پاکستان میں فوجی سربراہِ حکومت کو جہاں طول ملا وہاں ملک کی معیشت نے بھی بہت ترقی کی اور گزشتہ کئی دہائیوں میں شرح نمو میں اتنا اضافہ نہیں ہوا جتنا نائن الیون کے بعد پیدا ہونے والے حالات کی وجہ سے ہوا۔

پاکستان میں منی لانڈرنگ، دہشت گردی کی روک تھام، سائبر کرائم اور وائٹ کالر کرائم کو روکنے سمیت مدارس اور منی چینجرز کے اندراج اور بینکوں کے سخت قوانین بھی بنے۔

پاکستان کے جوہری بم کے خالق ڈاکٹر قدیر خان کا جوہری بلیک مارکیٹ کا سکینڈل سامنے آنے کو بھی بعض ناقدین نائن الیون کے بعد پیدا ہونے والے حالات کا دباؤ قرار دیتے ہیں لیکن حکومت اس کی نفی کرتی ہے۔

پاکستان میں گیارہ ستمبر کی پانچویں برسی کے موقع پر طالبان اور القائدہ کے حامی سمجھے جانے والے قبائلیوں سے حکومت نے سمجھوتہ کیا ہے۔ اس سمجھوتے کے تحت حکومت متاثرہ افراد کو معاوضہ دے گی اور ان سے پکڑا گیا تمام سامان چاہے وہ گاڑیاں ہوں یا ہتھیار واپس کرے گی۔

حکومت اور قبائلیوں کے اس سمجھوتے پر ملا جلا رد عمل سامنے آیا ہے۔ حکومت کے حامی کہتے ہیں کہ یہی درست قدم ہے جبکہ مخالفین کہتے ہیں کہ اس سے قبائلی اور وہاں موجود غیر ملکی شدت پسندوں کو منظم اور مضبوط ہونے کا موقع ملے گا۔