اعجاز مہر بی بی سی اردو ڈاٹ کام، اسلام آباد

	پاکستانی خواتین کے غیر ملکی شوہروں کو دہری شہریت پر اتفاق رائے۔

قومی اسمبلی میں حکمران جماعت اور حزب مخالف میں اتفاق رائے ایک ایسے وقت میں سامنے آیا ہے جب حزب مخالف نے وزیراعظم کے خلاف عدم اعتماد کی تحریک پیش کر رکھی ہے۔

قومی اسمبلی میں وقفہ سوالات کے دوران میجر(ر) ذوالفقار علی گوندل کے سوال پر ڈاکٹر شیرافگن نیازی نے ایوان کو بتایا کہ وزیراعظم کے سیکرٹری جاوید اختر سمیت گریڈ سترہ اور اس سے اوپر کے سترہ سرکاری افسران ایسے ہیں جن کی بیویاں غیر ملکی ہیں۔ جبکہ ایک خاتون افسر کے شوہر غیر ملکی ہیں۔

تاہم انہوں نے کہا کہ صوبوں میں غیر ملکی بیویوں اور شوہروں والے افسران کی معلومات ابھی اکٹھی کی جا رہی ہیں۔

پارلیمانی امور کے وزیر ڈاکٹر شیر افگن نے ایوان کو بتایا کہ سترہ میں سے تیرہ سرکاری ملازمین ایسے ہیں جن کی بیگمات کا تعلق بھارت سے ہے۔

کئی اراکین نے سوال اٹھایا کہ پاکستان کے عام شہریوں میں سے مردوں کو غیر ملکی خاتون سے شادی کی صورت میں ان کی بیگم کو تو پاکستان کی شہریت مل جاتی ہے لیکن خواتین کو غیر ملکیوں سے شادی کی صورت میں ان کے شوہروں کو شہریت کیوں نہیں ملتی؟

اس پر ڈاکٹر شیر افگن نیازی نے کہا کہ یہ امتیاز تو ہے لیکن قانون میں ترمیم کرنی ہوگی۔ اس دوران سابق وزیر داخلہ اعتزاز احسن نے بتایا کہ پاکستان کا سٹیزن شپ ایکٹ انیس سو تہتر کے آئین سے پہلے کا ہے اور ایسا امتیازی معاملہ جب ان کے سامنے آیا تھا تو انہوں نے وزارت داخلہ کو ہدایت کی تھی کہ جب تک قانون میں ترمیم ہو اس وقت تک خواتین کے ساتھ اس معاملے میں امتیازی سلوک ختم کیا جائے۔

اس معاملے پر بحث کے بعد فریقین نے اتفاق کیا کہ متعلقہ قانون میں ترمیم کی جائے گی۔