عدنان عادل بی بی سی اردو ڈاٹ کام، لاہور

گزشتہ ماہ ممبئی بم دھماکوں میں بھارت نے حافظ سعید کی ممنوعہ تنظیم لشکر طیبہ کو ان کا ذمہ دار ٹھہرایا تھا۔

دوسری طرف لاہور ضلعی حکومت نے حافظ سعید کی تنظیم جماعت الدعوۃ کو بارہ اگست کو مینار پاکستان کے قریب گڈی گراؤنڈ میں جلسہ کرنے کی دی گئی اجازت منسوخ کردی ہے۔

جماعت الدعوۃ کے ترجمان یحیٰ مجاہد کے مطابق بدھ کو نصف شب کے بعد ایک بجے جوہر ٹاؤن میں حافظ سعید کے گھر کے باہر پولیس کا دستہ تعینات کردیاگیا اور جیل کا عمل متعین کرکے ان کے گھر کو سب جیل قرار دے دیا گیا۔

ترجمان کا کہنا ہے حافظ سعید نے نظر بندی کے احکامات وصول کیے جن میں انہیں نقص امن کے قانون سولہ ایم پی او کے تحت ایک ماہ کے لیے نظر بند کیا گیا ہے۔

چوبرجی میں حافظ سعید کی تنظیم کے مرکزی دفتر مرکز قادسیہ کے باہر بھی پولیس کا پہرہ لگادیا گیا ہے۔

ضلعی حکومت نے دو دن پہلے ایم کیو ایم کو تیرہ اگست کو مینار پاکستان پر اور بارہ اگست کو جماعت الدعوۃ کو مینار کے پاس گراؤنڈ میں جلسہ کرنے کی اجازت دی تھی۔

ضلعی حکومت نے متحدہ مجلس عمل (ایم ایم اے) کو چودہ اگست کو مینار پاکستان پر جلسہ کرنے کی اجازت دینے سے بھی انکار کردیا ہے جس میں اتحاد برائے بحالی جمہوریت سمیت متحدہ حزب مخالف نے شرکت کرنے کا اعلان کیا تھا تاہم ایم ایم اے میں شامل جماعت اسلامی کے رہنما لیاقت بلوچ نے کہا ہے کہ اتحاد ہر صورت میں مقررہ دن مینار پاکستان پر جلسہ کرے گا۔

جنوری سنہ دو ہزار دو میں بھی حافظ سعید کو نطر بند کیا گیا تھا لیکن دس ماہ بعد رہا کردیا گیا تھا۔اسی سال پاکستان حکومت نے ان کی تنظیم لشکر طیبہ کو کالعدم قرار دے دیا تھا جبکہ امریکہ کے سٹیٹ ڈپارٹمنٹ نے اس تنظیم کو دہشت گرد قرار دیا تھا۔