رفعت اللہ اورکزئی بی بی سی اردو ڈاٹ کام، پشاور

	پاکستان کے طول وعرض میں بارشوں سے کئی اموات ہو چکی ہیں (فائل فوٹو)

پولیس کے مطابق اب تک صرف ایک شحض کو ہی زندہ بچایاجا سکا۔ کرک کے ضلعی پولیس افیسر مبارک زیب نے بی بی سی کو بتایا کہ یہ واقع ضلع کرک کی تحصیل تختی نصرتی میں سنیچر کو ایک میلے میں پیش آیا۔

ان کا کہنا تھا کہ تخت نصرتی کے علاقے میں لوغر نالے کے نام سے مشہور ایک جگہ ہے جہاں پر ہر ہفتے مال مویشیوں کا میلہ لگتا ہے۔

انہوں نے بتایا کہ لوگ میلے میں شریک تھے کہ اچانک سیلاب کا ایک بڑا ریلہ آیا جو چالیس افراد کو بہا کر لے گیا۔ اب تک سات لاشیں نکالی جاچکی ہے جبکہ دیگرافراد کی تلاش جاری ہے۔

انہوں نے کہا کے اس میلے میں شرکت کرنے کے لئے دوسرے اضلاع بنوں اور لکی مروت سے بھی تاجر آتے ہیں۔

ایک مقامی صحافی سجاد شاہ نے بتایا کہ نالے میں چھ فٹ اونچا پانی تھا اور اس کی رفتار اتنی تیز تھی کہ موقع پر موجود لوگوں کو اپنے آپ کو بچانے کا موقع نہیں مل سکا۔ انہوں نے بتایا کہ گزشتہ کئی دنوں سے پورے ضلع میں بارشیں ہورہی ہے اور سنیچر کی صبح سے بارش جاری ہے۔