عزیزاللہ خان
بی بی سی اردو ڈاٹ کام کوئٹہ |  |
|  بلوچستان میں بارشوں کی تباہی(فائل فوٹو) |
صوبہ بلوچستان کے مکران ڈویژن میں بارشوں کا سلسلہ ایک مرتبہ پھر شروع ہو گیا ہے اور کئی دیہات زیر آب آچکے ہیں۔ آکڑا ڈیم میں شگاف پڑنے کی اطلاع ہے اور سپل ویز سے پانی کا اخراج جاری ہے۔ ساحلی شاہراہ پر ایک پل سیلابی ریلے میں بہہ گیا ہے جس سے کراچی اور گوادر کے مابین رابطہ منقطع ہو گیا ہے۔ گوادر سے آمدہ اطلاعات کے مطابق شہر سے کوئی چالیس کلومیٹر دور آکڑا ڈیم میں پانی کی سطح رات کے وقت خطرناک حد تک اوپر چلی گئی تھی جس کے بعد سپل ویز سے پانی کا اخراج شروع ہو گیا تھا۔ اب تک کولانچ اور سربندر کے علاقے زیادہ متاثر ہوئے ہیں جبکہ گوادر شہر کے اندر ہوائی اڈہ، جینا ایوینیو کلچر سنٹر اور نیا آباد کے علاقوں میں پانی گھس گیا ہے۔ مقامی سطح پر کئی لوگ سنگھار ہاؤسنگ سکیم کے پاس ایک پہاڑ کوہ باطل پر پہنچ گئے ہیں۔ کرائسسز مینیجمنٹ سنٹر کے انچارج صدیق اکبر نے بتایا ہے کچھ دیہات زیر آب آگئے ہیں جبکہ ڈیم میں شگاف پڑنے کی اطلاعات ہیں۔ انہوں نے کہا کہ ایک پُل ٹوٹ گیا ہے جس سے ساحلی شاہراہ پر ٹریفک معطل کر دی گئی ہے۔انہوں نے کہا ہے کہ امدادی ٹیمیں علاقے میں پہنچ گئی ہیں اور امدادی کارروائیاں شروع کر دی گئی ہیں۔ ادھر یہ اطلاعات بھی مل رہی ہیں کہ ڈیم سے پانی کا اخراج کم ہو گیا ہے اور حالات پر قابو پالیا گیا ہے۔ ایک غیر سرکاری تنظیم کے نمائندہ ناصر نے گوادر سے بتایا ہے کہ حالات اتنے تشویشناک نہیں ہیں۔ مکران ڈویژن سے تعلق رکھنے والے سینیٹر اسلم بلیدی نے ٹیلیفون پر بی بی سی کو بتایا ہے کہ ضلعی انتظامیہ کا کوئی اہلکار موقع پر موجود نہیں ہے جبکہ لوگ دیہاتوں میں بے یارو مدد گار ٹیلوں پر کھڑے ہیں۔ | 
یہ صفحہ دوست کو ای میل کیجیئے
پرِنٹ کریں
