ریاض سہیل بی بی سی اردو ڈاٹ کام، کراچی

	جئے سندھ قومی محاذ کے سیکریٹری جنرل سمیت پندرہ کارکن لاپتہ ہیں۔

جئے سندھ قومی محاذ کے سیکریٹری جنرل ڈاکٹر صفدر سرکی، آصف بالادی، نواز خان زنئور، ستار ہکڑو، مظفر بھٹو، آکاش ملاح سمیت پندرہ سے زائد کارکن گزشتہ ایک عرصے سے گمشدہ ہیں۔

جئے سندھ قومی محاذ کی جانب سے سکھر خیرپور اضلاع کے سرحدی علاقے ببرلو پر جمعہ کے روز قومی شاہرا پر احتجاجی دھرنا دیا گیا۔

اس احتجاج میں خیرپور، سکھر سمیت شکارپور، لاڑکانہ، نوابشاہ اور دادو سے بھی لوگوں نے شرکت کی۔دھرنے وجہ سے قومی شاہراہ پر ٹریفک معطل رہی۔

دھرنے کو جئے سندھ قومی محاذ کے چیئرمین بشیر قریشی نے خطاب کرتے ہوئے کہاکہ سندھ میں قوم پرست کارکنوں کے خلاف ایک غیر اعلانیہ آپریشن جاری ہے۔

جس میں بیس سے زائد کارکنوں کو گرفتار کرکے گم کردیا گیا ہے جن کا کوئی پتہ نہیں ہے۔

انہوں نے بتایا کہ سندھ کے مختلف علاقوں سے کچھ دنوں میں پرتشدد لاشیں ملی ہیں جس وجہ سے ہمیں خدشات ہیں کہ کہیں قوم پرست کارکنوں کو قتل نہ کیا گیا ہو۔

انہوں نے مطالبہ کیا جس طرح سے سپریم کورٹ نے سندھ میں قبائلی جرگوں کا ازخود نوٹس لیا ہے اس طرح سے قوم پرستوں کی گمشدگی کا بھی نوٹس لیا جائے۔