ہارون رشید بی بی سی اردو ڈاٹ کام، پشاور

	ہر سال شندور کے مقام پر چترال اور گلگت کی پولو ٹیمیں مد مقابل ہوتی ہیں

اس دلچسپ کھیل کے خاتمے کے ساتھ ہی شندور کا سہ روز میلہ بھی اپنے اختتام کو پہنچ گیا۔ فائنل مقابلے میں صدر جنرل پرویز مشرف، ان کے صاحبزادے اور غیرملکی سیاحوں اور سفارت کاروں نے شرکت کی۔

روایتی مقامی موسیقی کی آواز کے سروں میں کھیل کا آغاز ہوا تو دونوں ٹیموں نے بڑھ چڑھ کر حملے کیئے لیکن مقررہ وقت میں مقابلہ سات سات گولوں سے برابر تھا۔ میچ کا فیصلہ اضافی بیس منٹ میں ہوا جب چترال کے رضاخان نے اپنی ٹیم کی جانب سے آٹھواں اور نواں گول کرکے میچ کو اپنے حق میں موڑ لیا۔

صدر نے اس موقع پر فاتح ٹیم کے لیئے پچاس ہزار جبکہ ہارنے والے ٹیم کے لیئے پچیس ہزار روپے کے انعام کا بھی اعلان کیا۔

صدر نے اپنی تقریر میں چترال سے گلگت سڑک کو پختہ کرنے سمیت کئی ترقیاتی منصوبوں کا اعلان کیا۔ انہوں نے کہا کہ شندور میں کسی قسم کی تعمیرات کی اجازت نہیں دی جائے گی تاکہ یہ علاقہ اپنی قدرتی خوبصورتی برقرار رکھ سکے۔

ہر سال ساڑھے تین ہزار فٹ کی بلندی پر شندور کے مقام پر چترال اور گلگت کے اضلاع کی پولو ٹیمیں مد مقابل ہوتی ہیں۔ اونچے برف پوش پہاڑوں اور نیلی شفاف جھیل کے کنارے ایک بڑے سے میدان میں یہ مقابلے ہوتے ہیں۔