عزیزاللہ خان بی بی سی اردو ڈاٹ کام، کوئٹہ

	بلوچستان کے علاقے کوہلو اس سے پہلے بھی شدید کشیدگی کی اطلاعات تھیں

کوہلو کے انتظامی افسر کمیل علی نے بتایا ہے کہ پہلا دھماکہ ایک ناکارہ ڈوزر کے نیچے ہوا ہے جس کے لیے لیویز کے دو اہلکار اس طرف جا رہے تھے کہ اچانک دوسرا دھماکہ ہوا جس سے ایک اہلکار کی ٹانگ اڑ گئی اور دوسرے اہلکار کی آنکھیں ضائع ہو گئیں۔

اس کے علاوہ ادھر سوئی سے مقامی لوگوں نے بتایا ہے کہ جمعہ کی صبح سے کوئی آٹھ ہیلی کاپٹر ڈیرہ بگٹی اور سوئی کے مختلف علاقوں پر پروازیں کر رہے تھے۔

شام تک واضح نہیں ہو سکا کہ ان پروازوں کے مقاصد کیا تھے تاہم مقامی لوگوں نے کہا کہ یہ ہیلی کاپٹر ٹوبہ کے علاقے کی طرف جا رہے تھے۔

ٹوبہ ڈیرہ بگٹی کا ایک دیہات ہے۔ سرکاری سطح پر اس بارے میں کچھ نہیں بتایا گیا۔

ادھر جمعرات کی شب کوہلو کے علاقے چھبی کچھ میں فرنٹیئر کور کے اہلکاروں اور مسلح قبائلیوں کے مابین جھڑپیں ہوئی ہیں جس میں ہلاکتوں کے حوالے سے متضاد اطلاعات موصول ہوئی ہیں۔

اپنے آپ کو کالعدم تنظیم بلوچ لبریشن آرمی کا ترجمان کہنے والے آزاد بلوچ نے ٹیلیفون پر بتایا ہے کہ انہوں نے ایف سی کی چوکی پر حملہ کیا ہے جس میں چھ اہلکار ہلاک اور زخمی ہوئے ہیں ۔

دوسری جانب ایف سی کے حکام نے کہا ہے کہ ایف سی کی جوابی کارروائی سے تین حملہ آور ہلاک اور کم سے کم دو حملہ آور زخمی ہوئے ہیں۔