ندیم سعید بی بی سی اردو ڈاٹ کام، ملتان

	موٹرسائیکل رکشہ ایک مقبول تاہم غیر محفوظ سواری ہے

یہ حادثہ سنیچر کی رات پیش آیا تھا تاہم ہلاک ہونے والے چار میں سے تین بچوں کی لاشیں کئی گھنٹوں کی تلاش کے بعد اتوار کے روز اس وقت ملیں جب نہر میں پانی کا اخراج بند کیا گیا۔

رحیم یار خان پولیس کے تھانہ اے ڈویژن کے انچارج عبیداللہ کے مطابق گاؤں چک ایک سو گیارہ پی کا دو خواتین اور سات بچوں پر مشتمل ایک خاندان اڈا خانپور سے کرائے پر حاصل کیئے گئے ایک موٹر سائیکل رکشہ پر سوار گھر واپس آرہا تھا کہ رکشہ بے قابو ہو کر ’صادق کینال‘ میں لڑھک گیا۔

راہگیروں نے دو خواتین اور تین بچوں کو ڈوبنے سے بچا لیا۔ تاہم اس دوران نو سالہ علی عدن دم توڑ چکا تھا جبکہ تین اور بچے لاپتہ تھے۔ اندھیرا ہوجانے کے باوجود متاثرہ خاندان اور انتظامیہ نے لاپتہ ہوجانے والے بچوں کی تلاش جاری رکھی لیکن کوئی کامیابی حاصل نہ ہوئی۔

اس پر محکمہ انہار سےنہر بند کرنے کی درخواست کی گئی۔ہلاک ہونے والے باقی تین بچوں کے نام نو سالہ انس تیمور، تین سالہ حلیمہ خالد اور ایک سالہ لائبہ شہزاد معلوم ہوئے ہیں۔

پولیس نے مقدمہ درج کرکے موٹر سائیکل رکشہ قبضے میں کر لیا ہے جبکہ اس کے مفرور ڈرائیور کی گرفتاری کے لیئے کاروائی کی جا رہی ہے۔