مبشر زیدی بی بی سی اردو ڈاٹ کام، اسلام آباد

	بینظیر نے کوئی غیر قانونی کام نہیں کیا: ترجمان

پاکستان میں بد عنوانی روکنے کے ادارے ’نیب‘ نے دعوٰی کیا ہے کہ سابق پاکستانی وزیراعظم بینظیر بھٹو نے عراق کے لیئے اقوام متحدہ کے تیل برائے خوراک پروگرام میں سابق صدام حکومت کو دو ملین ڈالر کمیشن دے کر ڈیڑھ سو ملین ڈالر کا ٹھیکہ لیا۔ قومی احتساب بیورو نے بینظیر بھٹو کے خلاف قانونی کاروائی کرنے کا اعلان بھی کیا ہے۔

قومی احتساب بیورو کے ڈپٹی چیئرمین حسن وسیم افضل کے مطابق سابق پاکستانی وزیرِاعظم نے سن دو ہزار میں ’پیٹو لائن‘ نامی کمپنی کھولی جس کو امریکی کمپنی’ بے آئل‘ نے تیل برائے خوراک پروگرام میں ٹھیکہ دینے کے لیئے پیسہ دیا۔ ’بے آئل‘ کے خلاف امریکہ میں سابق عراقی حکومت کو کمیشن دینے کے الزامات کے تحت مقدمہ چل رہا ہے۔

وسیم افضل کے مطابق اقوام متحدہ کی اس پروگرام میں بدعنوانیوں کے بارے میں مرتب کی گئی رپورٹ میں بھی بینظیر بھٹو کی کمپنی ’پیٹرو لائن‘ کا ذکر ہے۔ نیب کے مطابق اقوام متحدہ نے تمام ممبر ممالک کو اس پروگرام میں گھپلوں کی اپنے طور پر بھی تحقیقات کی اجازت دی ہے جس کے بعد قومی احتساب بیورو نے بینظیر بھٹو کے خلاف تحقیقات شروع کی ہیں۔

بےنظیر کے ترجمان نے ایک بیان میں کہا ہے کہ کیونکہ بینظیر بھٹو سن دو ہزار میں کسی حکومتی عہدے پر فائز نہیں تھیں لہذٰا اس طرح کا کاروبار کرنے یا کمپنیاں کھولنے پر کوئی پابندی نہیں۔

انہوں نے کہا کہ اگر یہ پیسہ غیر قانونی ذرائع سے حاصل کیا گیا ہوتا تو پھر یہ غیر قانونی کام ہوتا۔ ترجمان کے مطابق کوئی بھی پاکستانی بیرون ملک کاروبار کر سکتا ہے اور اس پر کوئی پابندی نہیں ہے۔ بےنظیر بھٹو کے بارے میں ترجمان کا کہنا تھا کہ وہ صاحب حیثیت خاتون ہیں اور وہ اپنے والد کی جائیداد میں سے ملنے والے وراثتی اثاثوں کی بھی مالک ہیں۔