عدنان عادل بی بی سی اردو ڈاٹ کام، لاہور

	حکومت نے انٹرپول سے چھ ملکوں میں ’ریڈ وارنٹ‘ جاری کرنے کے لیے کہا ہے

اخبار کے مطابق وزیرِ داخلہ آفتاب شیرپاؤ نے، جو ان دنوں امریکہ میں ہیں، اس بات کی تصدیق کی ہے کہ انٹرپول نے وارنٹ گرفتاری جاری کر دیے ہیں اور کہا ہے کہ قومی احتساب بیورو کی طرف سے ان افراد کی گرفتاری کی درخواست کو حکومت نے انٹرپول کو بھیجا تھا۔

اخبار کا کہنا ہے کہ حکومت نے انٹرپول کے فرانس میں دفتر سے کہا ہے کہ سابق وزیراعظم اور ان کے شوہر کے خلاف اپنی آمدن سے زیادہ کے اثاثے بنانے کے الزام میں دس مقدمات پاکستان میں زیرالتوا ہیں جن میں ایک مقدمہ بے نظیر کی والدہ نصرت بھٹو کے خلاف بھی ہے۔

اخبار کے مطابق پاکستان حکومت نے ان دونوں کی گرفتاری کے لیے انٹرپول سے چھ ملکوں میں ’ریڈ وارنٹ‘ جاری کرنے کے لیے کہا ہے جہاں یہ دونوں اکثر جاتے رہتے ہیں۔ انٹرپول کو ایک سو اسی ملکوں میں وارنٹ جاری کرنے کا اختیار ہے۔

جن مقدمات میں انٹرپول سے سرخ وارنٹ گرفتاری جاری کرنے کے لیے کہا گیا ہے ان میں ایس جی ایس کوٹیکنا کیس، اے آر وائی کیس، بی ایم ڈبلیو کیس اور ناجائز اثاثے بنانے کے الزامات کے تحت مقدمات شامل ہیں جو سابق وزیراعظم نوازشریف کے عہد حکومت میں ان پر قائم کیے گئے تھے۔