عدنان عادل بی بی سی اردو ڈاٹ کام، لاہور

	نصرت بھٹو اپنی یادداشت کھوچکی ہیں

پانچ سال پہلے نصرت بھٹو پر قومی احتساب بیورو کی جانب سے برطانیہ، فرانس اور سوئزرلینڈ میں ڈیڑھ ارب امریکی ڈالرز (سو ارب روپے سے زیادہ) کےغیر قانونی اثاثے بنانے کے الزام میں ایک ریفرنس دائر کیا گیا تھا۔

گزشتہ سال ستمبر میں احتساب جج نے نیب سے کہا تھا کہ وہ عدالت کو بتائیں کہ نصرت بھٹوکی جائیداد کی ضبطی کا جو حکم دیا گیا تھا تو کیا وہ ضبط کی گئی یا نہیں، اور ان اثاثوں کی تفصیل کیا ہے؟

نیب کے وکیل مصباح الحسن نے عدالت کو جمعرات کو بتایا کہ ریفرنس میں ہی نصرت بھٹو کے اثاثوں کی فہرست منسلک کی گئی ہے۔

تاہم جج نے کہا کہ یہ فہرست کافی نہیں ہے اور اس میں درج ملکی اثاثوں کی مالیت تو بیس لاکھ سے زیادہ نہیں۔ جج نے کہا کہ اس فہرست میں غیر ملکی اثاثوں کی تفصیل بھی نہیں ہے۔ جج نے کہا کہ نیب نصرت بھٹو کے مبینہ ڈیڑھ ارب ڈالر کے اثاثوں کی تفصیل بتائے۔

نیب کے وکیل نے عدالت کو جواب دیا کہ ہم اس پر کارروائی کررہے ہیں۔ اس پر جج نے کہا کہ وہ فہرست کی غیرموجودگی میں نصرت بھٹو کے اثاثوں کو قرق کرنے کا حکم نہیں دے سکتے اور ریفرنس کو داخل دفتر کرتے ہیں۔

	نصرت بھٹو شدید بیمار ہیں

پانچ سال پہلے احتساب عدالت نے نصرت بھٹو کے وارنٹ گرفتاری جاری کیے تھے اور دانستہ روپوشی کے الزام میں انہیں اٹھارہ نومبر سنہ دو ہزار کو دو سال قید اور جائیداد کی ضبطی کی سزا سنائی تھی۔

گزشتہ سال ستمبر میں اس سزا کے پانچ سال بعد احتساب عدالت کے جج رانا زاہد محمود نے اس ریفرنس کی دوبارہ سماعت شروع کردی تھی اور آج اسے دوبارہ داخل دفتر کردیا۔

احتساب عدالت کو بے نظیر بھٹو کے وکیل فاروق نائک نے بتایا تھا کہ نصرت بھٹو کے بارے میں بتایا گیا کہ وہ اپنی یادداشت کھوچکی ہیں اور اتنی بیمار ہیں کہ وہ اپنے وکالت نامہ بھی دستخط نہیں کرسکتیں۔

فاروق نائک نے احتساب جج کے سامنے ضابطہ فوجدای کی مختلف دفعات کے حوالے دیے اور عدالت سے کہا تھا کہ جو ملزم ذہنی طور پر صحت مند نہ ہو اسے کے خلاف کارروائی نہیں ہوسکتی۔