صدر مشرف کے لیئے پاکستان کو بطور علاقائی طاقت قائم رکھنا مشکل ہے

اس کے نتیجے میں جنرل پرویز مشرف کی زندگی اور اور بطور صدرِ پاکستان ان کی پوزیشن کے لیے بھی خطرے میں اضافہ ہوا ہے۔

امریکی صدر بش کے دورۂ پاکستان کے موقع پر تھنک ٹینک چیتھم ہاؤس کی جانب سے شائع ہونے والی ایک رپورٹ میں کہا گیا ہے کہ امریکہ اور دیگر مغربی طاقتوں کو اس بات پر آنکھ بند کر کے یقین نہیں کر لینا چاہیے کہ پرویز مشرف کو پاکستان پر مکمل کنٹرول حاصل ہے اور یہ بھی ضروری نہیں کہ وہ مستقبل میں بھی اس منظر پر موجود رہیں گے۔

اس مقالے میں اس بات پر بھی بحث کی گئی ہے کہ جیسے جیسے پاکستان اور امریکہ کے سفارتی تعلقات میں قربت آ رہی ہے صدر مشرف کے لیے پاکستان کو بطور علاقائی طاقت قائم رکھنا مشکل ہوتا جا رہا ہے۔ پاکستان نہ صرف چین کے مرکزی علاقائی اتحادی کا رتبہ کھو رہا ہے بلکہ افغانستان میں بھی پاکستان کا روایتی اثر کم ہو رہا ہے۔

ایک ایسے ملک میں جہاں سیاسی حلقوں میں افغانستان میں حکومتی اثر کو ملک کی علاقائی سیاست میں پیمانے کے طور پر دیکھا جاتا ہے، پاکستان کے افغانستان میں کم ہوتے اثر کا جنرل پرویز مشرف کے سیاسی قد پر برا اثر پڑ سکتا ہے۔

اس کے علاوہ پاکستانی حکومت کی خارجہ پالیسی کے خلاف ملک کے اندر بڑھتی ہوئی بے چینی کے بارے میں خبردار کرتے ہوئے اس رپورٹ میں کہا گیا ہے کہ جنرل مشرف پر اس وقت شدید دباؤ ہے کہ وہ بطور اتحادی امریکہ کی اتنی مدد نہ کریں جتنی وہ کرتے رہے ہیں۔ ایران پاکستان، انڈیا گیس پائپ لائن جیسے معاملات پر امریکی خارجہ اور سٹریٹجک پالیسی سے اختلاف اس دباؤ کا ہی نتیجہ معلوم ہوتا ہے۔

اس مقالے کی شریک مصنفہ ڈاکٹر فرزانہ شیخ لکھتی ہیں کہ’مغربی حکومتوں کو چاہیے کہ وہ جنرل پرویز مشرف کی خارجہ پالیسی میں آنے والی ان تبدیلیوں پر انہیں مزید ترغیبات دینے پر گریز کریں۔ اس کا مطلب یہ ہے کہ پاکستان کے سیاسی میدان میں ان تحریکوں کی حمایت کی جائے جن کے نتیجے میں ملک کا سیاسی منظر کھل کر سامنے آ سکے اور جنرل مشرف کے منظر سے ہٹنے کی صورت میں پیدا ہونے والے خلا کو پر کیا جا سکے‘۔

(یہ مقالہ کیمبرج یونیورسٹی کے سنٹر آف ساؤتھ ایشین سٹڈیز کے ایشیا پروگرام کی ایسوسی ایٹ فیلو ڈاکٹر فرزانہ شیخ اور بی بی سی ورلڈ سروس کے نامہ نگار اوون بینٹ جونز نے مشترکہ طور پر تحریر کیا ہے)