عدنان عادل بی بی سی اردو ڈاٹ کام، لاہور

	’لاہور توڑ پھوڑ میں کوئی سیاسی اور مذہبی جماعت شامل نہیں تھی‘

قاضی حسین احمد جماعت اسلامی کے مرکز منصورہ کے مہمان خانہ میں پچیس فروری سے نظر بند ہیں جسے سب جیل قرار دیا گیا ہے۔ ان کی سب جیل میں صحافیوں کو پولیس نے اندر جانے سے نہیں روکا۔

پریس کانفرنس میں بات چیت کرتے ہوئے انہوں نے کہا کہ تین مارچ کو مکمل پہیہ جام اور ہڑتال ہوگی جس کا اعلان مختلف سیاسی جماعتوں کے مشترکہ پلیٹ فارم قومی مجلس مشاورت نے کیا تھا اور ایک دن پہلے اے آر ڈی کے زیر اہتمام گول میز کانفرنس نے اس کی حمایت کی ہے۔

قاضی حسین احمد نے کہا کہ اس روز پوری دنیا میں یورپی اخباروں میں متنازعہ کارٹونوں کی اشاعت کے خلاف احتجاج کیا جائےگا اور ترکی، فلسطین، مصر، بنگلہ دیش، مراکش، قطر، سری لنکا، ملائشیا، تیونس اور لبنان سمیت مختلف ملکوں سے اسلامی تنظیموں نے اس احتجاج کی حمایت کا یقین دلایا ہے۔

قاضی حسین احمد نے اپنا موقف دہرایا کہ چودہ فروری کو لاہور میں ہونے والی توڑ پھوڑ میں کوئی سیاسی اور مذہبی جماعت شامل نہیں تھی بلکہ یہ انٹیلی جنس ایجنیسوں کے کارندوں کی کارستانی تھی تاکہ اس تحریک پر الزام لگایا جاسکے۔

قاضی حسین احمد نے کہا کہ پوری دنیا میں یورپی اخباروں میں متنازعہ کارٹونوں کی اشاعت کے خلاف احتجاج کیا جائےگا اور ترکی، فلسطین، مصر، بنگلہ دیش، مراکش، قطر، سری لنکا، ملائشیا، تیونس اور لبنان سمیت مختلف ملکوں سے اسلامی تنظیموں نے اس احتجاج کی حمایت کا یقین دلایا ہے

قاضی حسین احمد نے حکومت پر الزام لگایا کہ وہ ملک میں لوگوں کو فرقہ واریت کی بنیاد پر تقسیم کرنا چاہتی ہے لیکن کامیاب نہیں ہوگی۔

انہوں نے کہا کہ سامرہ میں دو اماموں کے روضوں پر دھماکے بھی فرقہ وارانہ تقسیم کے لیے کرائے گئےہیں۔

انہوں نے کہا کہ سامرہ صدیوں سے سنی آبادی کا علاقہ ہے جہاں ان روضوں کو پہلے کبھی نقصان نہیں پہنچا کیونکہ دونوں امام سنی اور شعیہ دونوں فرقوں کے لیے محترم ہیں۔ انہوں نے کہا کہ مسلمان علماء نے اس سازش کو پہچان لیا ہے۔

	قاضی حسین احمد اور مولانا فضل الرحمن صلح مشورہ کرتے ہوئے

قاضی حسین احمد نے باجوڑ میں بدھ کو ہونے والی پاکستان فوج کی کارروائی کی مذمت کی اور کہا کہ صدر بش کے بت کو نذرانہ دینے کے لیے حکومت نے مسلمان جوانوں کا خون بہایا ہے۔

قاضی حسین احمد نے کہا کہ تین مارچ کی ہڑتال ناموس رسالت کے تحفظ کے لیے ہے جبکہ مجلس عمل نے امریکی صدر بش کی آمد پر ناپسندیدگی کے اظہار کے لیے چار مارچ کو یوم سیاہ منانے کی اپیل کی ہے۔ اس دن کالے جھنڈے لہرائے جائیں گے اورلوگ بازؤوں پر کالی پٹیاں باندھیں گے لیکن ہڑتال نہیں کی جائے گی۔

قاضی حسین احمد کی پریس کانفرنس کا دعوت نامہ ملنے پر پنجاب حکومت کے شعبہ تعلقات عامہ نے صحافیوں کو (بی بی سی ) سمیت ٹیلیفون کرکے کہا کہ وہ اس پریس کانفرنس میں نہ جائیں کیونکہ قاضی حسین احمد نظر بند ہیں اور پولیس صحافیوں کو اندر نہیں جانے دے گی۔

بعض صحافیوں کا کہنا تھا کہ انہیں حکومت کی جانب سے کہا گیا کہ اگر وہ منصورہ گئے تو نتائج کی ذمہ داری ان پر ہوگی تاہم صحافی منصورہ پہنچے اور پولیس نے انہیں نہیں روکا۔

جماعت اسلامی کے ایک عہدیدار نے پہلے مہمان خانے کے لان میں قاضی حسین احمد کا بیان پڑھ کر سنایا اور کہا کہ صحافیوں کو دی گئی دھمکیوں کے پیش نطر قاضی حسین احمد پریس کانفرنس نہیں کریں گے۔

قاضی حسین احمد نے حکومت پر الزام لگایا کہ وہ ملک میں لوگوں کو فرقہ واریت کی بنیاد پر تقسیم کرنا چاہتی ہے لیکن کامیاب نہیں ہوگی۔

قاضی حسین احمدنے کہا کہ انہیں نطر بند کرکے اس جگہ کو سب جیل قرار دے دیا گیا ہے لیکن وہ خود پر کوئی پابندی نہیں لگاسکتے۔ انہوں نے کہا کہ جو ان سے ملنے آئےگا وہ اس سےبات کریں گے۔ انہوں کہا کہ آج پابندی انہوں نے نہیں بلکہ صحافیوں نے توڑی ہے۔

قاضی حسین احمد نے کہا کہ ان کی نظر بندی کو ہائی کورٹ میں چیلنج کیا گیا ہے اور قومی اسمبلی کے سپیکر کو بھی درخواست دی گئی ہے۔