 | | | یہ اقدام عملے کی سلامتی کے لیے کیا گیا ہے |
اقوامِ متحدہ نے پاکستان کے کچھ زلزلہ زدہ علاقوں میں امدادی ہیلی کاپٹروں کی پروازیں معطل کر دی ہیں۔ جمعہ کو اقوام متحدہ کے دو امدادی ہیلی کاپٹروں پر پاکستان کے زیرانتظام کشمیر کے ایک علاقے میں پھنسے ہوئے لوگوں نے دھاوا بول دیا تھا اور ہیلی کاپٹروں میں زبردستی سوار ہو گئے تھے۔ اقوامِ متحدہ کے اہلکار لیری ہولنگ ورتھ نے بی بی سی کو بتایا ہے کہ ہیلی کاپٹروں کے عملے کی سلامتی کے لیے لیپا کی وادی میں جانے والی پروازوں کو عارضی طور پر بند کر دیا جائے گا۔ انہوں نے کہا کہ یہ بدقسمتی ہے کہ کچھ لوگوں کی وجہ سے اکثریت خوراک سے محروم ہو گئی ہے۔ اس سے قبل اقوام متحدہ کے اہلکار لیری ہالنگ ورتھ نے اس واقعہ کی تصدیق کرتے ہوئے بتایا تھا کہ مقامی لوگوں نے ہیلی کاپٹروں پر نہ صرف دھاوا بولا بلکہ ہیلی کاپٹر کے عملے کے ساتھ بدتمیزی بھی کی اور زبردستی ہیلی کاپٹروں میں چڑھ کر بیٹھ گئے۔ ان افراد کا مطالبہ تھا کہ انہیں اس علاقے سے نکال کر محفوظ مقامات کی طرف لے جایا جائے۔ ان افراد کے مجبور کرنے پر ایک ہیلی کاپٹر نے کچھ افراد کو مظفرآباد اتارا جبکہ دوسرے ہیلی کاپٹر میں چڑھ جانے والے لوگوں کو ایبٹ آباد اتارا گیا۔ حکام کے مطابق یہ لوگ ہیلی کاپٹروں کے اترتے ہی وہاں سے بھاگ نکلے۔ اقوام متحدہ نے پاکستانی حکام سے اس بارے میں رابطہ کیا ہے اور معاملے کی تحقیقات ہو رہی ہیں۔ پاکستانی حکام نے اس واقع کا سخت نوٹس لیا ہے اور مقامی انتظامیہ کو ہدایات جاری کی ہیں کہ وہ مستقبل میں ایسے واقعات کی روک تھام کے لیے سخت انتظامات کریں۔ | 
زلزلہ کی نسلی اور طبقاتی دراڑیں
